არსებულ პოლიტიკურ კონტექსტში სისხლიანი ბანერების გაკვრა არასწორია, - ამის შესახებ პარტია „გირჩის" წევრმა, იაგო ხვიჩიამ დედაქალაქის რამდენიმე ადგილზე გაკრულ ბანერებთან დაკავშირებით განაცხადა.
მისივე თქმით, ბანერებზე ვინმე თუ უნდა გამოაკრან, ის ხალხი უნდა იყოს, ვინც ადამიანების პირადი ცხოვრების ქექვით არის დაკავებული.
„გამოხატვის თავისუფლების ფარგლებში პრობლემა არ უნდა შემიქნან, რომ თუ ვინმე სამარცხვინო დაფაზე გაკვრას დაიმსახურებს, ბანერზე გავაკრა. ფარული ჩანაწერების, თვალთვალისა და კონტროლის ფარგლებში ვიღაც უნდა მოვკლათ, მაგრამ ეს არ გვინდა, ამიტომ, პასუხის გასაცემად უნდა არსებობდეს - „ვინ გვარცხვენს" ფორმატი. ძალადობას ეს სჯობს, რაც საზოგადოებაში ფიზიკური ძალადობის ფაქტებს შეამცირებს. რაც მინდა, ის სადღაც უნდა დავწერო და მივახატო, ეს უნდა იყოს დაცული. ამას არ უნდა შეეწინააღმდეგოს ჩემს შემთხვევაში ქვეყნის კანონმდებლობა. ზოგადად, არსებულ პოლიტიკურ კონტექსტში მიმაჩნია, რომ სისხლიანი ბანერების გაკვრა არასწორია. არც სხვა ადამიანური თვალსაზრისით არ არის სწორი, ამ ბანერზე იმ ხალხს რომ ამატებ, ვინც გუშინ შენი ოპოზიცია გახდა. რაც შეეხება იმას, ბანერზე პირველს ვის გამოვაკრავდი, ამ ბანერზე თუ ვინმე უნდა გამოვაკრათ, ის ხალხი უნდა იყოს, ვინც ადამიანების პირადი ცხოვრების ქექვით და ცხვირის ჩაყოფით არის დაკავებული", - განაცხადა იაგო ხვიჩიამ.
