„ნაციონალური მოძრაობისგან“ დარჩა მხოლოდ და მხოლოდ ნანგრევები, ამ ნანგრევებიდან ვინ რა მასალას დაისაკუთრებს, ამაზე მიმდინარეობს პაექრობა ამ დაჯგუფებებს შორის, – ამის შესახებ საპარლამენტო უმრავლესობის წევრმა, მიხეილ სარჯველაძემ განაცხადა.
როგორც მიხეილ სარჯველაძემ აღნიშნა, თავმჯდომარის არჩევნები, რომელიც გაიმართა ბოლოს „ნაციონალურ მოძრაობაში“, ნათლად აჩვენებდა, იმდენად დაძაბული იყო ამ დაჯგუფებებს შორის ურთიერთობა, რომ ერთ-ერთ ჯგუფს აუცილებლად მოუწევდა წასვლა ამ პარტიიდან და შეუძლებელი იქნებოდა მუშაობის ერთობლივად გაგრძელება.
„ნიკა მელიას გუშინდელ განცხადებაში არაფერი მოულოდნელი არ ყოფილა, თუ არ ჩავთვლით რამდენიმე გამოყენებულ მეტაფორას, რომელიც ბატონმა მელიამ გააკეთა. პარტიაში ახლა მიმდინარეობს მტაცებლური დაპირისპირება, ვინ მეტს წამოიღებს იმ პარტიიდან ან ვინ მეტს დაიტოვებს. ამ შემთხვევაში იგულისხმება ის ელექტორატი, რომელიც მთლიანობაში „ნაციონალურ მოძრაობას“ ჰყავს, ვინ მეტს გაინაწილებს ნარჩენების გზით, ეს არის მთელი ამოცანა. „ნაციონალური მოძრაობისგან“ დარჩა მხოლოდ და მხოლოდ ნანგრევები. ამ ნანგრევებიდან ვინ რა მასალას დაისაკუთრებს, ამაზე მიმდინარეობს პაექრობა ამ დაჯგუფებებს შორის. არც ის იყო მოულოდნელი და უცნაური, რომ დასახელდა სხვა გვარებიც კეზერაშვილისა და მერაბიშვილის მიღმა. ყველა ის პიროვნება, რომელიც „ნაციონალური მოძრაობის“ ხელისუფლებასთან ასოცირდებოდა და ცუდად ასოცირდებოდა, ისინი არსად არ წასულან.
თავად მელიას მმართველობის დროსაც არ მგონია, რომ ინსტიტუციურად სანიმუშო მმართველობასთან გვქონდა საქმე, ეს ყოველთვის იყო. ჩვენი ოპოზიციის დამახასიათებელი ნიშან-თვისება გახდა, რომ სხვას აბრალებენ იმას, რაშიც თავად მიუძღვით ხოლმე ბრალი. მმართველობასთან დაკავშირებული მანკიერებები, რომელიც დამახასიათებელია მათი მმართველობისთვის, ელანდებათ ყველგან, რომ სხვაც ასე მართავს ყველაფერს. თუკი რაიმე ნაკლოვანება არსებობს, თავად რაც გააჩნიათ, სხვას აბრალებენ სრულიად დაუსაბუთებლად. მართლაც, თუკი რამე შეიძლება ითქვას ბოლოდროინდელ საქართველოში არაფორმალურ მმართველობაზე, ეს დამახასიათებელია თავად „ნაციონალური მოძრაობისთვის“, – განაცხადა სარჯველაძემ.
