საქართველოს მესამე პრეზიდენტ მიხეილ სააკაშვილს საზღვრის უკანონო კვეთისთვის ბრალს დღეს, 3 ოქტომბერს, წაუყენებენ. რამდენიმე დღის წინ, მიხეილ სააკაშვილმა სოციალური ქსელით დააანონსა, რომ საქართველოში 2 ოქტომბერს, საღამოს ჩამოვიდოდა, თუმცა 1-ელ ოქტომბერს, იგივე სოციალურ ქსელში დაწერა, რომ საქართველოში იყო და ვიდეოც გამოაქვეყნა, სადაც ამბობდა, რომ ბათუმში იმყოფებოდა.
„ქართული ოცნება" და სამართალდამცავი უწყებები მთელი დღის განმავლობაში აცხადებდნენ, რომ სააკაშვილი საქართველოში არ იმყოფებოდა და ის ტრუსკავეცკში, უკრაინაში იყო. 1-ელ ოქტომბერს, საღამოს, პრემიერ-მინისტრმა ირაკლი ღარიბაშვილმა საგანგებო ბრიფინგზე საზოგადოებას მიხეილ სააკაშვილის დაკავების შესახებ აცნობა.
საქართველოს მესამე პრეზიდენტი და უკრაინის რეფორმების სახელმწიფო საბჭოს თავმჯდომარე, მიხეილ სააკაშვილი მსჯავრდადებულია ყოფილი დეპუტატის, ვალერი გელაშვილის ცემის ფაქტზე და ასევე, სანდრო გირგვლიანის მკვლელობაში მსჯავრდადებული პირების შეწყალების საქმეებზე.
სასამართლომ მას 6 წლით თავისუფლების აღკვეთა მიუსაჯა და ასევე, სახელმწიფო სამსახურსა და ადგილობრივი თვითმმართველობის ორგანოში თანამდებობის დაკავების უფლება ჩამოართვა 2 წლითა და 3 თვით.
სასამართლოში ამჟამად სააკაშვილის წინააღმდეგ ე.წ პიჯაკების საქმეზე საბიუჯეტო თანხის 9 მილიონი ლარის ჯგუფურად გაფლანგვის საქმე, „იმედში" შეჭრის, 7 ნოემბრის აქციის დარბევის და პატარკაციშვილის ქონების ჩამორთმევის, სამსახურებრივი უფლებამოსილების გადამეტების საქმეები მიმდინარეობს
