დაბომბილი გორი, დევნილების კოლონა და ომის შედეგად გაჩენილი ხანძარი ბორჯომის ტყეში - კადრებს, რომელიც რუსეთის სისასტიკეს ასახავდა, ოკუპაციის მუზეუმში აღარ აჩვენებენ. ინფორმაციას რადიო თავისუფლება ავრცელებს, სადაც წერენ, რომ საბჭოთა ოკუპაციის მუზეუმის ექსპოზიციაში აღარ არის 2008 წლის ომის ამსახველი კადრები, რომელიც მუზეუმის პირველ დარბაზში, პროექტორის საშუალებით უჩვენებდნენ წლების განმავლობაში.
კადრები, სავარაუდოდ, 2022 წლის ოქტომბრის შემდეგ აღარაა ექსპოზიციის ნაწილი. ოკუპაციის მუზეუმში ამის მიზეზად პროექტორის დაზიანებას ასახელებენ. თუმცა, პასუხი არ აქვთ კითხვაზე - როდის დაზიანდა პროექტორი ან როდის დაბრუნდება გამოფენის ნაწილად რუსეთ-საქართველოს ომის ამსახველი დოკუმენტური მასალა.
საბჭოთა ოკუპაციის მუზეუმი 2006 წლის 26 მაისს გაიხსნა, საგამოფენო სივრცეს 2008 წლის ომის ამსახველი პროექცია მუზეუმის ექსპოზიციას მოგვიანებით დაემატა.
