განათლებისა და მეცნიერების მინისტრის გიორგი ამილახვრის განცხადებით, ქვეყნის მასშტაბით, 24 საგამოცდო ცენტრია გახსნილი.
როგორც მან თბილისის 175-ე სკოლაში გახსნილ საგამოცდო ცენტრში ჟურნალისტებს განუცხადა, ყველა ცენტრი სრულად არის მოწესრიგებული იმისთვის, რომ აბიტურიენტებმა თავიანთი ცოდნა მშვიდ გარემოში გამოავლინონ.
„ქვეყნის მასშტაბით გვაქვს 24 საგამოცდო ცენტრი. წელს დავამატეთ ქალაქ ამბროლაურში, ვინაიდან გვინდა, რომ ყველა ადგილზე ხელმისაწვდომი იყოს სერვისი. პირველი დღეა, ამიტომ, დიდი იმედი გვაქვს, რომ ყველაფერი უსაფრთხო გარემოში ჩაივლის. ყველა ცენტრი არის სრულად მოწესრიგებული, ჩვენმა გუნდმა ამისთვის ძალიან ბევრი იმუშავა, ყველა დავტესტეთ. არის როგორც ტექნოლოგიურად, პროგრამულად გამართული კომპიუტერები, ასევე გაგრილების სისტემა. საჭიროების შემთხვევაში გვყავს ექიმები. ყველა მხრივ შექმნილია ისეთი გარემო, რომ აბიტურიენტებმა, მშვიდად და წყნარად თავიანთი ცოდნა გამოავლინონ“, - განაცხადა ამილახვარმა.
ცნობისთვის, დღეს ერთიანი ეროვნული გამოცდები ქართული ენისა და ლიტერატურის გამოცდით დაიწყო, 26 ივლისს კი ფიზიკის გამოცდით დასრულდება. გამოცდების ეროვნული ცენტრის ინფორმაციით, ერთიანი ეროვნული გამოცდებისათვის რეგისტრირებულია გამოსაცდელთა რეკორდული რაოდენობა - 45 000-ზე მეტი აბიტურიენტი.
ცნობისთვის, დღეს ერთიანი ეროვნული გამოცდები ქართული ენისა და ლიტერატურის გამოცდით დაიწყო, 26 ივლისს კი ფიზიკის გამოცდით დასრულდება.
გამოცდების ეროვნული ცენტრის ინფორმაციით, ერთიანი ეროვნული გამოცდებისათვის რეგისტრირებულია გამოსაცდელთა რეკორდული რაოდენობა - 45 000-ზე მეტი აბიტურიენტი.
