სპეციალური პენიტენციური სამსახურის სამედიცინო დეპარტამენტის ხელმძღვანელი მალხაზ ურთქმელიძე აცხადებს, რომ საქართველოს ყოფილი პრეზიდენტი მიხეილ სააკაშვილი გაცილებით უკეთესად არის და წონაშიც იმატებს.
როგორც ურთქმელიძემ „ვივამედში“ ჟურნალისტებს განუცხადა, როდესაც მიხეილ სააკაშვილის ჯანმრთელობის მდგომარეობა კარგი იქნება, მას ციხეში გადაიყვანენ.
ამასთან, ჟურნალისტებმა მას ჰკითხეს კლინიკაში სააკაშვილის მოსანახულებლად მისულ პოლონელ ექიმებთან დაკავშირებით, რაზეც ურთქმელიძემ განაცხადა:
„არ მოუთხოვიათ შეხვედრა და მეც არაფერი ვიცი. სურვილი თუ ექნებათ, რატომაც არა? ვიცოდი, რომ დღეს უნდა ჩამოსულიყვნენ. „ვივამედის“ ექიმებთან, რა თქმა უნდა, მაქვს კომუნიკაცია. ჩემს პირად საქმეზე ვარ მოსული, მიშათი არ იწყება ცხოვრება. მშვენივრად არის მიშა, დაწყნარდით. გაცილებით უკეთესად არის და წონაში იმატებს. როცა კარგად იქნება, გადავიყვანთ ციხეში. უკეთ არ იყო, რომ ნახეთ სასამართლოში? არ იყო უკეთესად? ფაქტია, კაცმა მოიმატა. როცა ჭამს და საკვებს იღებს ნორმალურად, იმატებს. თუ არ შეჭამს, იქნება ცუდად. კარგად რომ იყოს, წავიყვანდით, რეკომენდაცია უნდა გასცეს კლინიკამ. რადგან კლინიკაში არის, ე.ი. რაღაც საჭიროება არის. მზად ვარ, პოლონელ ექიმებს შევხვდე, თუ სურვილი ექნებათ. რატომ არიან აქ, რა მისიით, ვერ გავიგე“, – განაცხადა მალხაზ ურთქმელიძემ.
