„ღირსეული ადამიანები ვართ“ - ამ სიტყვებით მიმართა მოსამართლეს გლდანში მომხდარი ანგარიშსწორების საქმეზე დაკავებულმა გლდანის გამგეობის თანამშრომელმა ტატო ხუნდაძემ.
ტატო ხუნდაძე ერთ-ერთია იმ დაკავებულებს შორის, ვინც დღეს მოსამართლეს მიმართა და თქვა, რომ ის მიმალვას არ ცდილობდა და ბათუმში მიდიოდა, რადგან არ იცოდა, რომ საგამოძიებო უწყებას მის მიმართ კითხვები ჰქონდა.
ხუნდაძის თქმით, ირაკლი ეძგვერაძესა და მის მეგობრებთან მცირე კონფლიქტი მართლაც მოუხდათ, თუმცა სერიოზულ ჩხუბში რომ გადაზრდილიყო კამათი, მაშინ ფიზიკური დაზიანება მათაც ექნებოდათ. ხუნდაძის თქმით, გარაჟში ეძგვერაძემ და მისმა მეგობრებმა თავად შეიპატიჟეს.
რას მოჰყვა დაპირისპირება, დაზარალებულებისგან რადიკალურად განსხვავებულ ვერსიას ჰყვება სასამართლო სხდომაზე ხუნდაძე და ამტკიცებს, რომ გარაჟში შესვლის შემდეგ დეპუტატმა ეძგვერაძემ და მისმა სამეგობრომ ხუნდაძეს და მის მეგობრებს „კახას დამცველები“, „სადამსჯელო რაზმი“ უწოდეს, რასაც დაპირისპირება მოჰყვა.
დღეს საქალაქო სასამართლომ გლდანში პოლიტიკური ანგარიშსწორების შემდეგ დაკავებული 6-ვე პირი პატიმრობაში დატოვა. საქმის არსებითი განხილვა 16 ნოემბერს დაიწყება.
