„ეს უსაქმური საქმეა, რასაც ოპოზიცია ახლა ახორციელებს", - განაცხადა დღეს, 10 ნოემბერს, პარლამენტის ადამიანის უფლებათა დაცვის კომიტეტის თავმჯდომარე მიხეილ სარჯველაძემ.
შეგახსენებთ: ოპოზიცია თბილისში, სხვადასხვა ლოკაციაზე საპროტესტო აქციებს მართავს, რა დროსაც შსს-მ, ჯამში, 46 ადამიანი დააკავა.
„უფლებების ჩარჩო და ზღვარი სად გადის, ამას ადგენს მოქმედი კანონი და კონსტიტუციურ სტანდარტების რომ დავრჩეთ, აუცილებელია ყველამ კანონი დაიცვას. საპოლიციო ღონისძიებები დასაშვებია კანონდარღვევის პრევენციისთვის და რეაგირებისთვის. უმიზეზოდ დაკავება არ შეიძლება, თუმცა ოპოზიციასაც ვერ დავეთანხმები, რომ მიზეზის გარეშე ადამიანებს აპატიმრებენ. ოპოზიცია ამბობს, რომ პოლიციელები გამვლელებს მივარდნენ და აპატიმრებენ? რაც შეეხება აქციის შინაარსს, რეალურად, აქციების მიზანია არა მიხეილ სააკაშვილის მხარდაჭერა და მისი ჯანმრთელობისა და უსაფრთხოების გულშემატკივრობა, არამედ დესტაბილიზაციისთვის ამინდის შექმნა, რაც არის მთლიანი ორკესტრის შემადგენელი სხვადასხვა კომპონენტები, ინსტრუმენტები. ეს ყველაფერი კეთდება იმისათვის, რომ ხელოვნურად უბედურების განცდა გაჩნდეს. საამისო მიზეზი არ არის, ამიტომ, ეს უსაქმური საქმე, რასაც ოპოზიცია ახლა ახორციელებს", - განაცხადა სარჯველაძემ.
