აშშ-მა აღმოსავლეთ სირიაში იარაღის შესანახ ობიექტზე იერიში მიიტანა, – ამის შესახებ პენტაგონი აცხადებს.
„ეს ზუსტი თავდაცვითი დარტყმა არის პასუხი ერაყსა და სირიაში აშშ-ის პერსონალის წინააღმდეგ განხორციელებულ თავდასხმებზე”, – განაცხადა აშშ-ის თავდაცვის მინისტრმა, ლოიდ ოსტინმა.
მისივე თქმით, აშშ-ის პრეზიდენტს არ აქვს უფრო მაღალი პრიორიტეტი, ვიდრე აშშ-ის პერსონალის უსაფრთხოება და მან მიმართა დღევანდელ მოქმედებებს, რათა ნათლად განემარტა, რომ აშშ დაიცავს საკუთარ თავს, თავის პერსონალს და საკუთარ ინტერესებს.
„აშშ სრულად არის მზად, მიიღოს შემდგომი აუცილებელი ზომები ჩვენი ხალხისა და ჩვენი ობიექტების დასაცავად,” – აღნიშნა ოსტინმა.
აშშ-ის თავდაცვის მინისტრმა განაცხადა, რომ თავდასხმა მიზნად ისახავდა „მკაფიო გზავნილის მიწოდებას ირანისთვის, რომ ჩვენ მათ ვუპასუხებთ აშშ-ის ძალებზე თავდასხმებისთვის“ და რომ აშშ მოელის, რომ ირანი „მიიღებს ზომებს, რათა მიმართოს თავის მარიონეტებს და შეაჩეროს ისინი”.
როგორც მედია წერს, ოქტომბრის დასაწყისიდან აშშ-ისა და კოალიციის ჯარებს ერაყსა და სირიაში ირანის მხარდაჭერილი ძალები, სულ მცირე, 41-ჯერ დაესხნენ თავს.
„ჩვენ შეშფოთებულები ვართ ერაყსა და სირიაში ჩვენს ჯარებზე და ჩვენს ობიექტებზე თავდასხმებით. ჩვენი ბოლო დარტყმების შემდეგ იყო დამატებითი დარტყმები, რის გამოც განვახორციელეთ მორიგი საპასუხო დარტყმა, რათა ამ მარიონეტულ ჯგუფებს და ირანს გავუგზავნოთ ძლიერი გზავნილი, რომ ეს მიუღებელია. ახლა მათ ექნებათ არჩევანის გაკეთების საშუალება და თუ ისინი აირჩევენ ჩვენს ჯარებზე დარტყმის გაგრძელებას, თუ გააგრძელებენ ამ სარაკეტო და უპილოტო თვითმფრინავებით თავდასხმებს, მაშინ გავაგრძელებთ იმას, რაც უნდა გავაკეთოთ, რათა დავიცვათ თავი“, – განაცხადა თეთრი სახლის ეროვნული უშიშროების საბჭოს სტრატეგიული კომუნიკაციების კოორდინატორმა, ჯონ კირბიმ.
