ნატა ფერაძეს რომ არ ვიცნობდე, ერთი შეხედვით, მეგონებოდა, რომ ეს ქმედება იყო ხელისუფლების პროვოკაცია, რადგან ყველაფერი რაც ხდება, ხელისუფლების სასარგებლოა, - ამის შესახებ „გირჩის“ დეპუტატმა იაგო ხვიჩიამ განაცხადა, რითაც სტალინის გამოსახულებით სამების საკათედრო ტაძარში არსებულ ხატზე საღებავის შესხმას და ნატა ფერაძის სახლთან „ალტ-ინფოს“ მიმდინარე აქციას გამოეხმაურა.
მისივე თქმით, პოლიტიკური დისკურსის ნაცვლად, ახლა მიმდინარეობს სტალინის და მატრონას, „ალტ ინფოს“ და ნატა ფერაძის შესახებ მსჯელობა, რასაც „პოლიტიკური თვალსაზრისით, არანაირი შინაარსი ზეგ უკვე აღარ ექნება“.
„ყველა პერსონა, რომელიც სადღაც ეკლესიაში შეიძლება იყოს გაკრული, შეიძლება არ იყოს ჩემი გემოვნების შესაფერისი, ეს ქმედება თავის შინაარსით შეიძლება ბუნებრივადაც ქნას ადამიანმა, მაგრამ მე პირველი ეჭვს მივიტანდი რომ ეს იქნებოდა ხელისუფლების მიერ მოწყობილი პროვოკაცია, რადგან ყველაზე მეტად აწყობდა ხელისუფლებას. ხელისუფლებამ შეძლო ამით ისრების გადატანა საერთოდ სხვაგან, საერთოდ სხვა თემაზე და ნაცვლად იმისა, რომ პოლიტიკური დისკურსი გვქონდეს და პოლიტიკურ თემებზე ვსაუბრობდეთ, ჩვენ ახლა ვარჩევთ სტალინს და მატრონას, „ალტ ინფოს“ და ნატა ფერაძეს, რასაც არანაირი შინაარსი პოლიტიკური თვალსაზრისით ზეგ უკვე აღარ ექნება. ხელისუფლება როგორ დავადანაშაულო, რომ მან დაკიდა ეკლესიაში ხატი, მე ამის მტკიცებულება არ მაქვს. ხელისუფლების მხრიდან წახალისებულია. რომ არ ვიცნობდე ნატა ფერაძეს და რომ არ მქონდეს ეჭვი, რომ შეიძლება თვითონაც გაეკეთებინა ეს დამოუკიდებლად, მეგონებოდა, რომ ეს ქმედება იყო ხელისუფლების პროვოკაცია, რადგან ყველაფერი რაც აქ ხდებოდა იყო ხელისუფლების სასარგებლო, ხელისუფლებამ გამოიყენა ისრების სხვაგან გადასატანად და ახლა იყენებს ამას მისი პოლიტიკური ოპონენტების დისკრედიტაციისთვის. ამის ხელოვნურად მოწყობა, არ ვიცი, ვის რაში აწყობს, თუ ის ხელისუფლებიდან არ იმართება, მაგრამ ვინაიდან ვიცნობ ნატა ფერაძეს, ვუშვებ, რომ მისი ინდივიდუალური პერფორმანსიც შეიძლება იყოს. საშინლად ვაფასებ ამ პერფორმანსს, მგონია, რომ ეს არის უაზრო პროვოკაციული პერფორმანსი, რომელსაც არანაირი დადებითი შედეგი არ მოჰყოლია ქართული საზოგადოებისთვის და არც მოჰყვება”, - განაცხადა ხვიჩიამ.
