მაღალი დონის ინვესტორთა ფორუმზე ხაზი გაესვა საქართველოს მნიშვნელობას ევროპისა და ცენტრალური აზიის სატრანსპორტო დაკავშირებადობის კუთხით, – ამის შესახებ ეკონომიკისა და მდგრადი განვითარების მინისტრის მოადგილემ, გურამ გურამიშვილმა განაცხადა, რომელიც ბრიუსელში მიმდინარე მაღალი დონის ინვესტორთა ფორუმში მონაწილეობს.
ეკონომიკის სამინისტროს ინფორმაციით, ღონისძიება 29-30 იანვარს ინიციატივა „გლობალური კარიბჭეს“ ფარგლებში, ევროკავშირის ორგანიზებით ტარდება და ევროპასა და ცენტრალურ აზიას შორის სატრანსპორტო კავშირების განვითარების პერსპექტივებს განიხილავს.
„ფორუმი ეძღვნება ევროკავშირისა და აზიის სატრანსპორტო დაკავშირებადობას. ამ კონტექსში საქართველო და მასზე გამავალი შუა დერეფნის მარშრუტი მნიშვნელოვან როლს თამაშობს. დღეს ფორუმზე ხაზი გაესვა საქართველოს მნიშვნელობას ამ დაკავშირებადობის კუთხით. განხილული იყო და საუბრები წარიმართა იმ მნიშვნელოვან პროექტებზე, რომლებსაც საქართველო ახორციელებს შუა დერეფნის მდგრადობის მიმართულებით – მხედველობაში მაქვს რკინიგზის მოდერნიზაცია, აღმოსავლეთ-დასავლეთის ჩქაროსნული ავტომაგისტრალი, ანაკლიის პორტის პროექტი.
ევროკავშირთან ასოცირების ვალდებულებების ფარგლებში საქართველომ მნიშვნელოვან პროგრესს მიაღწია ტრანსპორტის კუთხით საკანონმდებლო დაახლოებაში ევროკავშირთან. 2024 წელი მნიშვნელოვანია, რადგან ჩვენ გადავდივართ ახალ ეტაპზე და ამ კუთხით გვექნება მნიშვნელოვანი პროგრესი“, – აღნიშნა გურამიშვილმა.
მინისტრის მოადგილის თქმით, ხაზგასასმელია და მნიშვნელოვანია, რომ ხელი შეეწყოს შავ ზღვაზე პირდაპირ დაკავშირებადობას ევროკავშირის ქვეყნებთან.
„დღეისთვის საქართველოს რუმინეთსა და ბულგარეთთან აქვს პირდაპირი მიმოსვლა. სამომავლოდ აღნიშნული სატრანსპორტო კავშირი კიდევ უფრო გაიზრდება, რისთვისაც ეკონომიკისა და მდგრადი განვითარების სამინისტრო შესაბამის მხარეებთან აწარმოებს მოლაპარაკებას. ასევე მნიშვნელოვანია, საქართველომ შუა დერეფანში ამ პროექტების განხორციელების კუთხით პოზიციონირება გააუმჯობესოს“, – განაცხადა გურამ გურამიშვილმა.
ეკონომიკის სამინისტროს ცნობით, ფორუმზე განიხილება ევროპის რეკონსტრუქციისა და განვითარების ბანკის (EBRD) 2023 წლის კვლევა, რომლის მიზანსაც წარმოადგენდა ყველაზე მდგრადი და პერსპექტიული მარშრუტების იდენტიფიცირება ევროპასა და ცენტრალურ აზიას შორის.
„კვლევის მიხედვით, ტრანსკასპიური მარშრუტი (შუა დერეფანი) ამ კუთხით ყველაზე მიმზიდველ მარშრუტად შეფასდა. ცენტრალური აზიის ქვეყნებისთვის განისაზღვრა პოტენციური საინვესტიციო პროექტები და სხვა კონკრეტული ღონისძიებები სატრანსპორტო კავშირების გასაუმჯობესებლად. აღნიშნული კვლევის მიხედვით, შესაბამისი გამტარუნარიანობის პირობებში, 2040 წლისთვის ევროპა-ჩინეთს შორის ტრანსკასპიური მარშურტით საკონტეინერო მიმოსვლა, შესაძლოა, 1.1 მლნ კონტეინერამდე გაიზარდოს“, – აღნიშნულია ეკონომიკისა და მდგრადი განვითარების სამინისტროს ინფორმაციაში.
