„ტერმინი „შეეწირა" არის უადგილო", - განაცხადა, დღეს, 10 დეკემბერს, ეკონომიკისა და მდგრადი განვითარების მინისტრმა, ნათია თურნავამ ჯანდაცვის მინისტრის გადადგომაზე საუბრისას.
შეგახსენებთ: ეკატერინე ტიკარაძემ თანამდებობა გუშინ, 9 დეკემბერს, „ოცნების" ოფისში გამართულ ბრიფინგზე დატოვა, თუმცა გადადგომის მიზეზი არ დაუსახელებია. მან თქვა, რომ მოღვაწეობას მმართველი პარტიის პოლიტსაბჭოში გააგრძელებს.
„ვერ დაგეთანხმებით, თვითონ ტერმინი „შეეწირა" არის უადგილო. არანაირი დაპირისპირება არ ყოფილა და ზოგადად ჩვენ მთავრობაში საკადრო გადაწყვეტილებების უკან ნუ ეძებეთ მედია რაიმე სკანდალურ კონტექსტს. ეს არის ჩვეულებრივი ამბავი, ხდება ხოლმე სხვადასხვა ადგილზე გადანაცვლება. ის გუნდის წევრად რჩება. გარკვეული ეტაპი, რაზეც მან თვითონ ძალიან კარგად და დეტალურად ისაუბრა ჩავლილია პანდემიასთან ბრძოლის და ახლა ახალი ეტაპი იწყება. ამას ახალი საკადრო გადაწყვეტილებები სჭირდება", - განაცხადა თურნავამ.
