მგონი, არანაირი საფუძველი არავისთვის არ მიმიცია, უმრავლესობაში გადავდივართ თუ არა, ეჭვი ჰქონდეთ, – ამის შესახებ „გირჩის“ წევრმა, იაგო ხვიჩიამ პარლამენტში პრემიერისა და მთავრობის ახალი შემადგენლობის დამტკიცების პროცესზე საუბრისას განაცხადა.
როგორც იაგო ხვიჩიამ აღნიშნა, განხილვებს დაესწრება, თუმცა კითხვების დასმას არ გეგმავს.
„შენ თუ პრემიერს და მის კაბინეტს მხარს უჭერ, ესე იგი, უმრავლესობაში გადასულხარ. მე მგონი, არანაირი საფუძველი არავისთვის არ მიმიცია, უმრავლესობაში გადავდივართ თუ არა, ეჭვი ჰქონდეთ. რაც შეეხება განხილვებს, მე ხალხმა ამირჩია ამ შენობაში და ვალდებული ვარ, რომ ჩემი საქმე კვალიფიციურად შევასრულო, ყველაფერს დავესწრო, რაც აქ ხდება, თუ საჭიროა იმისთვის, რომ მეტი ინფორმაცია გამოვიტანო, კითხვები დავსვა და ადამიანებს მოვუყვე ამის შესახებ. ასე ვიქცევი აქ შემოსვლის დღიდან და ვიდრე ვარ ამ პარლამენტის შენობაში. ხალხი უფრო მეტ მანდატს ვიდრე არ მომცემს, რომ მხოლოდ ამბავი კი არ გამოვიტანო, არამედ რამე შევცვალო, მანამდე ხალხს ვეტყვი იმის შესახებ, რასაც ვნახავ ამ შენობაში. არანაირი კითხვა არ მაქვს. ისედაც, რა კითხვებიც შეიძლება არსებობდეს, იმაზე მაინც არ მიპასუხებენ და ფორმალური კითხვების დასმას, მგონი, შინაარსი არ გააჩნია. თუ რამეა, ისე ვკითხავ კობახიძეს და ისე მეტყვის“, – განაცხადა იაგო ხვიჩიამ.
