„ნაციონალური მოძრაობა" უნდა დასუსტდეს და მათ დასუსტებაში არის პოლიტიკური ვითარების გაუმჯობესების გასაღები",- ამის შესახებ პარტია „ქართული ოცნების" თავმჯდომარე ირაკლი კობახიძემ, დღეს, 14 დეკემბერს განაცხადა.
კობახიძის შეფასებით, ენმ-ისგან შერიგებასა და დეესკალაციაზე საუაბრი არის აბსოლუტური ფარსი.
„ნაციონალური მოძრაობა" მუდმივად სუსტდება, მათ შორის იმის გამო, რომ არჩევნები წააგეს და იციან, სამი წელი არავითარი არჩევნები აღარ იქნება. მათ შორის იმის გამო, რომ მათი ბელადი ციხეშია. „ნაციონალური მოძრაობა" უნდა დასუსტდეს და მათ დასუსტებაში არის პოლიტიკური ვითარების გაუმჯობესების გასაღები.
მიხეილ სააკაშვილის განცხადებაზე შერიგებასთან დაკავშირებით იყო ძალიან მარტივად გასაშიფრი, ეს იყო ტაქტიკური ნაბიჯი მისი მხრიდან. ძალიან მარტივად გაიშიფრა.
ეს ყველაფერი დაადასტურა კიდევ ერთხელ იმ განცხადებამ, რომელიც 21 დეკემბრის აქციას და ზოგადად აქციებს უკავშირდება. მათი რეალური ბუნება ვერ შეიცვლება. მათი რეალური ბუნება არის ის, რომ მუდმივად არიან მიდრეკილნი დესტრუქციისკენ, ქვეყნისა და სახელმწიფოს საწინააღმდეგო მოქმედებებისკენ, ამას ისინი ვერ მოიშლიან. აქედან გამომდინარე, მათი მხრიდან შერიგებასა თუ დეესკალაციაზე საუბარი არის აბსოლუტური ფარსი, ამ ფარს ვერ გავყვებით. ჩვენ გავყვებით იმ მოცემულობას, რომელიც არის სინამდვილე. ის დესტრუქციული ძალაა", - განაცხადა კობახიძემ.
