სამთავრობო პროგრამას, ისევე როგორც პრემიერობის ახალ კანდიდატს, ჩემი ნდობა არ ექნება - ბიძინა ივანიშვილის საჭადრაკო დაფაზე პაიკების გადაადგილება მისი ძალაუფლების და გავლენების შენარჩუნების ერთადერთი ინსტრუმენტია, - ამის შესახებ ოპოზიციონერმა დეპუტატმა, თეონა აქუბარდიამ ჟურნალისტებთან საუბრისას განაცხადა.
მისივე თქმით, სამთავრობო ცვლილებებით ქვეყნისთვის უკეთესობისკენ არაფერი იცვლება და კვლავ ძალაუფლების შენარჩუნების ინტერესი გაგრძელდება.
„თუ ავიღებთ ირაკლი ღარიბაშვილის და ირაკლი კობახიძის სამთავრობო პროგრამებს, ეს არის აბსოლუტურად იდენტური ტექსტი, თუმცა ამ იდენტური ტექსტის მიუხედავად, არის გარკვეული განსხვავებები, რაც არც თუ ისე დამაიმედებლად გამოიყურება, მით უფრო მაშინ, როდესაც ჩვენ 9 რეკომენდაცია გვაქვს განსახორციელებელი ევროკავშირში გაწევრიანების პროცესის დასაჩქარებლად და ნატო-ში წევრობაც ვფიქრობ, რომ ჯერ კიდევ რჩება გაცხადებულ ეროვნულ ინტერესად, ყოველ შემთხვევაში, ხალხის. მოცემულობაში, როდესაც ნატო-ში გაწევრიანება იცვლება ნატო-ში ინტეგრაციად, რაც დაქვეითებაა, როდესაც უსაფრთხოების გამოწვევების მიუხედავად, არაფერი არ არის ნათქვამი, რა ფორმით უნდა მოხდეს ამის გაუმჯობესება, როდესაც „ქართული ოცნება“ დეოკუპაციას გვპირდება და მათ შორის, არც კი არის მოხსენიებული გაგრძელდება თუ არა მუშაობა ეროვნული ხედვაზე, რა თქმა უნდა, გასაგებია, რომ ეს ნიშნავს, არაფერი შეიცვლება უკეთესობისკენ, არამედ კვლავ ძალაუფლების შენარჩუნების ინტერესი გაგრძელდება,“ - განაცხადა აქუბარდიამ.
