„ეროვნული თანხმობა აუცილებელია, რათა იმ გამოწვევებს გავუმკლავდეთ, რაც ქვეყანას აქვს",- ამის შესახებ საქართველოს პარლამენტის ვიცე-სპიკერმა ლევან იოსელიანმა ორბელიანების სასახლეში პრეზიდენტისა და პოლიტიკური პარტიების შეხვედრასთან დაკავშირებით განაცხადა.
მისი თქმით, მნიშვნელოვანია რაღაც ფორმატის შექმნა, სადაც სულ მცირე, საუბარი დაიწყება.
„ერთ სივრცეში შეკრება, როცა ამას ფასილიტატორები არ ესწრებოდნენ, წინ გადადგმული ნაბიჯია. ქართველებმა ერთმანეთთან საუბარი უნდა ვისწავლოთ. ამ საუბრის დასაწყისია ის, რომ ერთმანეთს შევხვდით, მივესალმეთ და ამის შემდეგ შეიძლება, ნაბიჯები გადაიდგას. ეროვნული თანხმობა აუცილებელია, რათა იმ გამოწვევებს გავუმკლავდეთ, რაც ქვეყანას აქვს. განსაკუთრებით, რეგიონულ ჭრილში რუსეთის აგრესიის ფონზე", - განაცხადა იოსელიანმა.
შეგახსენებთ,
საქართველოს პრეზიდენტის სასახლეში გუშინ პარტიების წარმომადგენლებთან შეხვედრა გაიმართა. შეხვედრაზე მიწვეული იყვნენ როგორც საპარლამენტო, ასევე არასაპარლამენტო პარტიების წარმომადგენლები, შეხვედრაზე არ იმყოფებოდნენ „დროას", „ლეიბორისტების", „ნაციონალური მოძრაობისა" და „ლელოს" ლიდერები.
