აშშ-ის პრეზიდენტმა, ჯო ბაიდენმა „რესპუბლიკელები“ გააკრიტიკა მას შემდეგ, რაც მათ სენატში ორპარტიული სასაზღვრო შეთანხმება და საგარეო დახმარების პაკეტის წინსვლა დაბლოკეს, - ინფორმაციას CNN-ი ავრცელებს.
ტელეკომპანიის ცნობით, ბაიდენმა განაცხადა, რომ არასდროს იფიქრებდა, ნახავდა მსგავს რამეს, რასაც ახლა ხედავს. პრეზიდენტის მტკიცებით, მისი ოპონენტი და აშშ-ის ყოფილი პრეზიდენტი, დონალდ ტრამპი კანონმდებლებს ანგარიშსწორებით ემუქრებოდა, თუ ისინი მხარს დაუჭერდნენ პაკეტს.
„„რესპუბლიკელები“ უკან იხევენ, რადგან დონალდ ტრამპი მათ ურეკავს და ემუქრება“, - აღნიშნა ბაიდენმა.
ცნობისთვის, გუშინ, აშშ-ის სენატმა კენჭი უყარა უკრაინის, ისრაელისა და ტაივანის დახმარებისა და ამერიკის საზღვრების უსაფრთხოების შესახებ კანონპროექტზე შემდგომი განხილვის საკითხს, თუმცა საჭირო 60 ხმის მოგროვება ვერ მოხერხდა. კენჭისყრის შედეგების შემდეგ ცნობილი გახდა, რომ კანონპროექტის განხილვის მომხრე იყო მხოლოდ 49 სენატორი, 50 კი - წინააღმდეგი წავიდა.
