თბილისის მერის კახა კალაძის განცხადებით, „ქართულ ოცნებას“ აქვს რეალური შესაძლებლობა, კონსტიტუციური უმრავლესობით მოვიდეს ხელისუფლებაში.
მისივე თქმით, ასეთი დიდი მხარდაჭერა „ქართულ ოცნებას“ 2012 წლის შემდეგ არ ჰქონია.
„„ქართული ოცნება“ გამარჯვებისთვის ემზადება, როგორც ყოველთვის და რეალური შესაძლებლობა აქვს, რომ კონსტიტუციური უმრავლესობით მოვიდეს ხელისუფლებაში. ძალიან დიდია საზოგადოების მხრიდან მხარდაჭერა. რამდენ არჩევნებში მაქვს მონაწილეობა მიღებული, 2012 წლიდან მოვდივართ ერთად და ასეთი მხარდაჭერა, როგორიც აქვს დღეს, 2012 წლის შემდეგ არ ჰქონია „ქართულ ოცნებას“. საზოგადოება ნათლად ხედავს ყველაფერს. დღეს ინფორმაცია ჩაკეტილი არ არის. წარსულს ჩაბარდა ის წლები, როდესაც ხელისუფლება გაბატონებული იყო, ჯიბეში ჰქონდა ყველა მედიასაშუალება და რთული იყო სწორი ინფორმაციის მიღება. დღეს ბევრ რამეზე მიგვიწვდება ხელი. შესაბამისად, ხალხი ხედავს, რა ხდებოდა, როგორი ზეწოლა, შემოტევები იყო, მაგრამ ჩვენ ჩვენი სიმტკიცით, პრინციპულობით და პატრიოტიზმით სიმშვიდე და მშვიდობა შევინარჩუნეთ ქვეყანაში, მოვახდინეთ ქვეყნის ეკონომიკური განვითარება. ქვეყანამ კანდიდატის სტატუსი მიიღო და ამ პრინციპებით ვაპირებთ, მომავალში გავაგრძელოთ ჩვენი ცხოვრება, სადაც, პირველ რიგში, გათვალისწინებულია ქვეყნის და საზოგადოების ინტერესი“, – განაცხადა კახა კალაძემ.
