უკრაინის ქმედებები შეზღუდულია იარაღის მოქმედების სიშორითა და ეფექტურობის ხარისხით, – ამის შესახებ უკრაინის პრეზიდენტმა, ვოლოდიმირ ზელენსკიმ მიუნხენის უსაფრთხოების კონფერენციაზე სიტყვით გამოსვლისას განაცხადა.
მან კიდევ ერთხელ მოუწოდა დასავლეთს, სამხედრო დახმარება გაუწიოს უკრაინას და აღნიშნა, რომ კიევმა უკვე დაამტკიცა, რომ შეუძლია ბრძოლის ველზე რუსეთის დამარცხება.
„ჩვენ შეგვიძლია ჩვენი მიწის დაბრუნება და პუტინს შეუძლია, დამარცხდეს. ეს უკვე მოხდა ერთხელ და მეტჯერაც ბრძოლის ველზე. ჩვენი ქმედებები შეზღუდულია განადგურების საშუალებების ეფექტურობის ხარისხით და მოქმედების მანძილით, მაგრამ ეს ჩვენზე არ არის დამოკიდებული და ავედეევკაში შექმნილი სიტუაცია ამას ცხადჰყოფს“, – აღნიშნა ზელენსკიმ.
მისივე თქმით, უკრაინას შეიარაღების ხელოვნურ დეფიციტში ამყოფებენ, რაც პუტინს ინტენსიურ საბრძოლო მოქმედებებთან ადაპტაციის საშუალებას აძლევს.
„ეს დემოკრატიის თვითშესუსტება ძირს უთხრის ჩვენს საერთო შედეგებს“, – თქვა ზელენსკიმ.
უკრაინის პრეზიდენტმა ასევე განაცხადა, რომ რუსეთი არა მხოლოდ უკრაინას, არამედ წესებზე დამყარებულ მსოფლიო წესრიგს უქმნის საფრთხეს.
„კიდევ რამდენ ხანს მისცემს მსოფლიო საშუალებას რუსეთს, დარჩეს ასეთად? სწორედ ეს არის მთავარი კითხვა დღეს. რაც უფრო დიდხანს გაგრძელდება რუსეთის აგრესია წესებზე დამყარებული მსოფლიო წესრიგის წინააღმდეგ, მით უფრო დიდი ცვლილებებს ვიხილავთ. შესაძლოა, ადამიანებს მოუხდეთ ცხოვრება ისეთ მსოფლიოში, სადაც ლოკალური ომები მხოლოდ ლოკალური აღარ იქნება. ნებისმიერი ომი ქმნის საფრთხეს, გარდაიქმნას გლობალურ კატასტროფად. შესაძლოა, სურსათისა და მიგრაციის იარაღად გამოყენებამ დაარღვიოს არსებული რეგიონული ბალანსი და ძირი გამოუთხაროს ბევრ პოლიტიკურ სისტემას არა მხოლოდ ევროპაში, არამედ ახლო აღმოსავლეთში, აფრიკაში და ამერიკაშიც“, – განაცხადა ზელენსკიმ.
