ოდესაზე რუსეთის ფედერაციის მიერ განხორციელებული თავდასხმის შედეგად დაღუპულთა რიცხვი ცხრამდე გაიზარდა. ინფორმაციას უკრაინის საგანგებო სიტუაციების სახელმწიფო სამსახური ავრცელებს.
დაღუპულებს შორის ორი ბავშვია - ერთ-ერთი მათგანი 3-დან 5 წლამდე ასაკის, მეორე კი 3 თვის, რომელიც მაშველებმა ნანგრევებიდან დედის ცხედართან ერთად ამოიყვანეს.
ამასთან, მედიის ინფორმაციით, შვიდ დაშავებულს შორის 3 წლის ბავშვია.
ოდესასა და ოდესის ოლქში კვირა, 3 მარტი გლოვის დღედ გამოცხადდა.
შეგახსენებთ, გუშინ რუსებმა უკრაინას Shahed-131/136 ტიპის 8 დრონით შეუტიეს, 7 მათგანი უკრაინის საჰაერო თავდაცვის ძალებმა ჩამოაგდეს, ერთი კი - 9-სართულიან საცხოვრებელ კორპუსს დაეჯახა.
