გამოდის მმართველი პარტიის სპიკერი და ამბობს საქართველო არაა მზად ევროკავშირისთვისო!- მხოლოდ ორი ვინმე ამბობს ამას - რუსეთი და “ოცნება” - ამის შესახებ პარტია „ლელოს“ ერთ-ერთმა ლიდერმა დეპუტატმა ანა ნაცვლიშვილმა განაცხადა.
აღნიშნულით ის „ქართული ოცნების“ თავმჯდომარის, ირაკლი ღარიბაშვილის განცხადებას გამოეხმაურა, რომელმაც აღნიშნა, რომ „დღეს არ ვართ მზად, რომ გავხდეთ ევროკავშირის წევრი ქვეყანა“, ამასთან, „არც ევროკავშირია მზად გაფართოებისთვის“.
“ევროკავშირმა მიიღო ისტორიული გადაწყვეტილება და გახსნა კარი გაფართოებისთვის - საქართველოსთვის. გერმანიის კანცლერმა "ევროკავშირი ლისაბონიდან თბილისამდეო” ახალი გეოპოლიტიკური რეალობა გააცხადა. ეს რეალობა თავისი ბრძოლით ააშენა ქართველმა ხალხმა - მარტის ბრძოლით მათ შორის, და ამ დროს გამოდის მმართველი პარტიის სპიკერი და ამბობს საქართველო არაა მზად ევროკავშირისთვისო!
მხოლოდ ორი ვინმე ამბობს ამას - რუსეთი და “ოცნება”, სხვა ყველა ისტორიულ გაფართოებას უჭერს მხარს და ამისთვის მუშაობს. მაშ, რისთვისაა მზად საქართველო ოცნების აზრით?!
იმისთვის, რომ ოფშორებიდან კრიმინალური ფული გადმოიტანონ რუსმა ოლიგარქებმა აქ და ამ ფულის სამრეცხაოდ გადაიქცეს ქვეყანა (ამის კანონი მიიღეს რუსულ კანონთან ერთად), ხოლო თუ ვინმე ხმას ამოიღებს აღნიშნულზე და შეეწინააღმდეგება, რუსული კანონით გააჩუმონ.
ოლიგარქის ოცნება რომ ხართ მზად ამ სცენარისთვის, ვხედავთ, მაგრამ ხალხი არ არის თანახმა ამაზე, ხალხი, ვისაც ეკუთვნის ეს ქვეყანა!
თქვენ ვინ ხართ, რომ დაასრულოთ ამ ქვეყნის ისტორია?! ისტორიას წერს ხალხი და თქვენ ამ ისტორიაში მოღალატეების სახელით ჩაეწერებით!“, - აღნიშნა ნაცვლიშვილმა.
