შინაგან საქმეთა სამინისტრომ ნარკოდანაშაულისთვის ცხრა პირი, მათ შორის ოთხი ნარკორეალიზატორი დააკავა, ამოღებულია განსაკუთრებით დიდი ოდენობით ნარკოტიკული საშუალებები. ინფორმაციას შსს ავრცელებს.
„შინაგან საქმეთა სამინისტროს ცენტრალური კრიმინალური პოლიციის დეპარტამენტის ნარკოტიკების უკანონო ბრუნვის წინააღმდეგ ბრძოლის მთავარი სამმართველოს და ქვემო ქართლის პოლიციის დეპარტამენტის გარდაბნის რაიონული სამმართველოს თანამშრომლებმა, ჩატარებული ოპერატიული და საგამოძიებო მოქმედებების შედეგად, ბოლო პერიოდში, სხვადასხვა დროს, ნარკოდანაშაულისთვის ცხრა პირი დააკავეს.
1973 წელს დაბადებული შ.ა.-ს, 1975 წელს დაბადებულ ბ.შ.-ს, უცხო ქვეყნის მოქალაქეს - 1988 წელს დაბადებულ ა.გ.-ს, ასევე, წარსულში ნასამართლევ პირებს: 1993 წელს დაბადებული ე.ა.-ს და 1994 წელს დაბადებული ე.ჯ.-ს ბრალი ედებათ განსაკუთრებით დიდი ოდენობით ნარკოტიკული საშუალების უკანონო შეძენა-შენახვაში, ხოლო 1990 წელს დაბადებული გ.კ., უცხო ქვეყნის მოქალაქე - 1989 წელს დაბადებული ე. ს., 1980 წელს დაბადებული თ. ს. და 1960 წელს დაბადებული ი. დ. ნარკორეალიზაციისთვის არიან დაკავებული. დანაშაულები 8-დან 20 წლამდე ან უვადო თავისუფლების აღკვეთას ითვალისწინებს.
პოლიციამ ნარკორეალიზატორთა გამოსავლენად, მოსამართლის განჩინების საფუძველზე, რამდენიმე ეტაპად განახორციელა ნარკოტიკული საშუალება „ბუპრენორფინის", „ჰეროინის" და „მარიხუანის" საკონტროლო შესყიდვები და მათი ფარული აუდიო-ვიდეო ჩაწერა. ნივთმტკიცებად ამოღებულია, სავარაუდოდ, ნარკოტიკების რეალიზაციის შედეგად მიღებული თანხა.
სამართალდამცველებმა განსაკუთრებით დიდი ოდენობით ნარკოტიკული საშუალების უკანონო შეძენა-შენახვისთვის დაკავებული პირების საცხოვრებელი სახლისა და პირადი ჩხრეკისას, ასევე, სპეციალურად მოწყობილი სათბურიდან, ნივთმტკიცებად ამოიღეს: „ჰეროინის" შემცველი ერთი კილოგრამი ნარკოტიკული ნივთიერება, ექვსი ამპულა „მორფინი", ხუთი შეკვრა ნარკოტიკული საშუალება „ჰეროინი", ხუთი ცალი კონტეინერი მასში მოთავსებული მეტადონის სითხით, ნარკოტიკული საშუალება „ლიზერგიდის" (LSD) შემცველი 300 ფირფიტა, ხუთ კილოგრამამდე „მარიხუანა", ნარკოტიკული საშუალება „ამფეტამინი", ასევე, 35 გრამი ნარკოტიკულ საშუალება „პსილოცინის" შემცველი სოკო", - აცხადებენ შსს-ში.
უწყების ცნობით, გამოძიება საქართველოს სსკ-ის 260-ე მუხლის მე-6 და მე-7 ნაწილების „ა" ქვეპუნქტით, 265-ე მუხლის მე-3 ნაწილის „ა" ქვეპუნქტით და 273-ე პირველი პრიმა მუხლის მე-6 ნაწილით მიმდინარეობს.
