უნგრეთი მზად არის მიგრანტებს და თავშესაფრის მაძიებლებს, რომლებსაც ევროკავშირის ტერიტორიაზე შესვლა სურთ, ბრიუსელამდე უფასო ცალმხრივი ბილეთები გადასცეს, - Associated Press-ის ინფორმაციით, ამის შესახებ უნგრეთის პრემიერის, ვიქტორ ორბანის აპარატის ხელმძღვანელმა, გერგელი გულიასმა განაცხადა.
მან, ბუდაპეშტში გამართულ პრესკონფერენციაზე საუბრისას, გააკრიტიკა ევროპის მართლმსაჯულების სასამართლოს გადაწყვეტილება, რომლის თანახმადაც უნგრეთს, ბლოკის თავშესაფრის წესების მუდმივი დარღვევისთვის, 200 მილიონი ევროს ოდენობით ჯარიმის გადახდა დააკისრა. ასევე, სასამართლოს გადაწყვეტილებით, უნგრეთმა უნდა გადაიხადოს დამატებით 1 მილიონი ევრო დღეში მანამ, სანამ ის თავის პოლიტიკას ევროკავშირის კანონმდებლობასთან შესაბამისობაში არ მოიყვანს.
„ბრიუსელს სურს, ნებისმიერ ფასად გვაიძულოს მიგრანტების შემოშვება“, - აღნიშნა გერგელი გულიასმა.
მისი თქმით, თუ ევროკავშირი გააგრძელებს უნგრეთისთვის რეგულაციების თავს მოხვევას, რომელიც შეუძლებელს ხდის მიგრანტების საზღვარზე დაკავებას, მისი ქვეყანა ყველა მიგრანტს ბრიუსელში უფასო ტრანსპორტს შესთავაზებს.
„უნგრეთს არ სურს ამ დღიური ჯარიმის განუსაზღვრელი ვადით გადახდა, ამიტომ ჩვენ ადამიანებს შესვლის საშუალებას მივცემთ, თუკი მათ სურთ და შევთავაზებთ ცალმხრივ ბილეთს ბრიუსელამდე. თუ ბრიუსელს სურს მიგრანტები, შეუძლია ჰყავდეს“, - აღნიშნა გერგელი გულიასმა.
