უკრაინის პრეზიდენტი, ვოლოდიმირ ზელენსკი რუსული ძალების მიერ უკრაინის ტერიტორიაზე დღეს განხორციელებულ თავდასხმას ეხმაურება და პარტნიორებს კიდევ ერთხელ სთხოვს, უკრაინის მიმართ დახმარება გაზარდონ.
„მთელი ქვეყნის მასშტაბით მიმდინარეობს ძალისხმევა რუსეთის დარტყმის შედეგების აღმოსაფხვრელად. ეს იყო ერთ-ერთი ყველაზე დიდი შეტევა - კომბინირებული დარტყმა, სხვადასხვა ტიპის ასზე მეტი რაკეტისა და Shahed-ის ტიპის ასამდე დრონის გამოყენებით. ეს იყო მზაკვრული დარტყმა, რომლის სამიზნეც კრიტიკული სამოქალაქო ინფრასტრუქტურა იყო. ენერგეტიკის სექტორს მნიშვნელოვანი ზიანი მიადგა, მაგრამ ელექტროენერგიის შეწყვეტის შედეგად დაზარალებულ ყველა ტერიტორიაზე აღდგენითი სამუშაოები უკვე მიმდინარეობს“, - წერს ზელენსკი სოციალურ პლატფორმა X-ზე.
მისი თქმით, ბევრად მეტის გაკეთება იქნებოდა შესაძლებელი ადამიანების გადასარჩენად, უკრაინის F-16-ებთან და საჰაერო თავდაცვის სისტემებთან ერთად მისი ევროპელი მეზობლების ავიაციასაც რომ ემოქმედა.
„მნიშვნელოვანია, რომ ჩვენმა პარტნიორებმა დაიცვან ის ვალდებულებები, რომლებიც ჩვენ ერთად ავიღეთ, განსაკუთრებით საჰაერო თავდაცვის სისტემებთან, რაკეტებთან დაკავშირებით და ამის მიღმა. ჩვენ საბოლოოდ უნდა გავაერთიანოთ ძალისხმევა რუსული რაკეტებისა და უპილოტო საფრენი აპარატის ჩამოსაგდებად. დღეს მათი სამიზნეები იყო ვოლინის, ლვოვის, ივანო-ფრანკოვსკის, ვინიცის, ხმელნიცკის და ტერნოპოლის ოლქები. უკრაინის მასშტაბით ჩვენ ბევრად მეტის გაკეთება შეგვეძლო სიცოცხლის დასაცავად, ჩვენს F-16-ებთან და საჰაერო თავდაცვის სისტემებთან ერთად ჩვენი ევროპელი მეზობლების ავიაციას რომ ემოქმედა. თუ ასეთი ერთობა ეფექტური აღმოჩნდა ახლო აღმოსავლეთში, მან უნდა იმოქმედოს ევროპაშიც. სიცოცხლეს ყველგან ერთნაირი მნიშვნელობა აქვს“, - აცხადებს ზელენსკი.
მისი თქმით, უკრაინის ყველა პარტნიორმა იცის, რომ ომის სამართლიანად დასასრულებლად გადამწყვეტი ნაბიჯებია საჭირო.
„პუტინს შეუძლია იმოქმედოს მხოლოდ იმ საზღვრებში, რასაც მას მსოფლიო უდგენს. სისუსტე და არაადეკვატური პასუხები იწვევს ტერორს. ყველა ლიდერმა, თითოეულმა ჩვენმა პარტნიორმა იცის, რომ ამ ომის სამართლიანად დასასრულებლად გადამწყვეტი ქმედებებია საჭირო. უკრაინა არ შეიძლება იყოს შეზღუდული შორი-მანძილის შესაძლებლობებით, როდესაც ტერორისტებს ასეთი შეზღუდვები არ ემუქრებათ. ჩვენს დამცველებს არ შეიძლება ჰქონდეთ იარაღთან დაკავშირებული შეზღუდვა, როდესაც რუსეთი მთელ არსენალს იყენებს, მათ შორის Shahed-ებს და ბალისტიკურ რაკეტებს ჩრდილოეთ კორეიდან. ამერიკას, ბრიტანეთს, საფრანგეთს და ჩვენს სხვა პარტნიორებს აქვთ ძალა, დაგვეხმარონ ამ ტერორის შეჩერებაში. გადამწყვეტი მოქმედების დროა“, - წერს ზელენსკი.
