უკრაინაზე რუსეთის მიერ განხორციელებული მორიგი მასიური დარტყმის შედეგად 4 ადამიანი დაიღუპა და 16 დაშავდა, - ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.
მისი თქმით, სამაშველო ოპერაცია გრძელდება დარტყმისა და ნამსხვრევების ვარდნის ადგილებში უკრაინის იმ ოლქებში, რომლებშიც თავდასხმა განხორციელდა.
„სამწუხაროდ, ჩვენი საჰაერო თავდაცვის ეფექტური მუშაობის მიუხედავად, დაიღუპა 4 და დაშავდა 16 ადამიანი. ვუსამძიმრებ დაღუპულთა ოჯახებს და მეგობრებს“, - აღნიშნა ზელენსკიმ.
მისი თქმით, რუსებმა მშვიდობიანი მოსახლეობის და ინფრასტრუქტურის წინააღმდეგ 90-ზე მეტი დრონი და რაკეტა გამოიყენეს, მათ შორის ფრთოსანი, ბალისტიკური და აერობალისტიკური რაკეტები.
„ჩვენ აუცილებლად ვუპასუხებთ რუსეთს ამ და ყველა სხვა თავდასხმისთვის. კაცობრიობის წინააღმდეგ ჩადენილი დანაშაულის დაუსჯელად დატოვება არ შეიძლება“, - აღნიშნა ზელენსკიმ.
