ყველგან, სადაც ჩვენმა ემიგრანტებმა მოითხოვეს საარჩევნო უბნების გახსნა, გახსნან! - წინააღმდეგ შემთხვევაში ეს მათი კონსტიტუციური უფლების შებღალვა იქნება, - ამის შესახებ „ერთიანობა ნაციონალური მოძრაობის“ წევრმა თამარ კორძაიამ, უცხოეთში საარჩევნო უბნების გახსნასთან დაკავშირებით განაცხადა.
მისი განცხადებით, მიუხედავად მოთხოვნისა, მოლოდინი არ აქვს, რომ ცესკო მოქალაქეების ინტერესებიდან გამომდინარე იმოქმედებს.
„ცენტრალური საარჩევნო კომისია დღეს იღებს გადაწყვეტილებას, თუ სად გახსნის საარჩევნო უბნებს. ჩვენ მოვითხოვთ, საარჩევნო უბნები გაიხსნას ყველა იმ ქალაქში, სადაც მოქალაქეებმა მოითხოვეს უბნების გახსნა. ვიცით, რომ ჩვენი ემიგრანტები უცხოეთში კარგი ცხოვრების საძებნელად არ წასულან, არამედ იმიტომ, რომ აქ სიღარიბესა და იზოლაციაში არიან. იქიდან არჩენენ თავიანთ ოჯახის წევრებს და ეს გასათვალისწინებელია. ცესკო-მ ჩვენი მოქალაქეების უფლება უნდა უზრუნველყოს.
დღევანდელი მონაცემებით, 66 997 ადამიანია აღრიცხვაზე, აქედან გამომდინარე, ყველგან, სადაც ჩვენმა ემიგრანტებმა მოითხოვეს საარჩევნო უბნების გახსნა, გახსნან, ასეთი ქალაქებია: ბოსტონო, ლოძი, ტორონტო, ანტვერპენი, მაიამი, ლეჩე, შტუტგარტი, ვალენსია, ჰამბურგი, ნეაპოლი.
ყველგან დაწერილია განცხადება საარჩევნო უბნების გახსნასთან დაკავშირებით. წინააღმდეგ შემთხვევაში ეს მათი კონსტიტუციური უფლების შებღალვა იქნება.
სამწუხაროდ, მოლოდინი არ მაქვს, რომ ცესკო ემიგრანტების ინტერესებიდან გამომდინარე იხელმძღვანელებს“, - განაცხადა თამარ კორძაიამ.
