მედიის მხარდამჭერ აქციაზე „რესპუბლიკის მოედანზე“ შეკრებილი ოპერატორები და ჟურნალისტები საქართველოს პარლამენტთან მსვლელობით მიდიან. რუსთაველის გამზირზე გზა ნაწილობრივაა გადაკეტილი.
აქციის მონაწილე ჟურნალისტები და ოპერატორები ერთმანეთისთვის სოლიდარობის გამოსაცხადებლად არიან შეკრებილი.
ისინი სკანდირებენ: „სოლიდარობა მედიას“, „თავისუფლება მედიას“.
პარალელურად მათ მოქალაქეები მანქანებიდან სიგნალებითა და შეძახილებით ამხნევებენ.
აქციის მონაწილეებს ადგილზე მიტანილი აქვთ იმ ადამიანების ფოტოები, რომლებიც ქვეყანაში მიმდინარე აქციების დროს დაშავდნენ.
აქციის მონაწილეები მხარდაჭერას უცხადებენ მედიის იმ წარმომადგენლებს, რომლებიც ქვეყანაში მიმდინარე აქციებზე პროფესიული მოვალეობის შესრულების დროს თავდასხმის ობიექტი გახდნენ.
შეგახსენებთ, რომ გუშინ „ტვ პირველის“ ოპერატორს გიორგი შეწირულს და ჟურნალისტს მაკა ჩიხლაძეს სამსახურებრივი მოვალეობის შესრულების დროს ნიღბიანი პირები თავს დაესხნენ.
ორივე მათგანს ტვინის შერყევა აღენიშნება. სპეციალურმა საგამოძიებო სამსახურმა კი საქართველოს სისხლის სამართლის კოდექსის 154-ე მუხლის მეორე ნაწილით დაიწყო გამოძიება, რაც ჟურნალისტისთვის პროფესიულ საქმიანობაში უკანონოდ ხელის შეშლას ითვალისწინებს.
