საქართველოს მეხუთე პრეზიდენტ სალომე ზურაბიშვილსა და ევროპული საბჭოს პრეზიდენტ ანტონიო კოშტას შორის სატელეფონო საუბარი შედგა.
როგორც სალომე ზურაბიშვილი ევროპული საბჭოს პრეზიდენტთან გამართული საუბრის შემდეგ X-ის საკუთარ გვერდზე წერს, ანტონიო კოშტასთან საუბარი ჰქონდა საქართველოში კატასტროფულ დემოკრატიულ უკუსვლაზე და რუსულ ჰიბრიდულ სტრატეგიაზე "“ქართული ოცნების" მარიონეტული რეჟიმის მეშვეობით”.
“მნიშვნელოვანი საუბარი [მქონდა] ევროპული საბჭოს პრეზიდენტ ანტონიო კოშტასთან საქართველოში კატასტროფულ დემოკრატიულ უკუსვლაზე, რუსეთის ჰიბრიდული სტრატეგიის შესახებ, რომელიც “ქართული ოცნების” მარიონეტული რეჟიმის მეშვეობით კონტროლის მოპოვებას ისახავს მიზნად, ასევე მნიშვნელობებზე შავი ზღვისა და კავკასიის ევროკავშირის სტრატეგიისთვის”, - წერს ზურაბიშვილი.
სალომე ზურაბიშვილის პრესსამსახურის ინფორმაციით, სალომე ზურაბიშვილსა და ევროპული საბჭოს პრეზიდენტს შორის სატელეფონო საუბარი ევროპული საბჭოს პრეზიდენტის ანტონიო კოშტას ინიციატივით გაიმართა. ამავე ინფორმაციით, ანტონიო კოშტამ სალომე ზურაბიშვილს დეტალური ინფორმაციის მიწოდება სთხოვა საქართველოში არსებული მდგომარეობის შესახებ, როგორც "დემოკრატიული დარღვევების ასევე, რეპრესიების მიმართულებით".
"პრეზიდენტმა ხაზი გაუსვა: გაყალბებული არჩევნების შემდეგ ქვეყანაში შექმნილ ვითარებას, კატასტროფულ დემოკრატიულ უკუსვლას, ადამიანის უფლებების დარღვევის ფაქტებს, კრიტიკულ მდგომარეობას მედიაში და რუსეთის გაძლიერებულ გავლენებს. პრეზიდენტი კოშტა დაინტერესდა რა მოლოდინები არსებობს ქვეყანაში საზოგადოებისა და პოლიტიკური სპექტრის მხრიდან ევროკავშირის მიმართ", - აღნიშნულია სალომე ზურაბიშვილის პრესსასმახურის მიერ გარცელებულ ინფორმაციაში.
