2025 წლის როლან გაროსის გამარჯვებული ესპანელი კარლოს ალკარასია. მსოფლიოს მეორე ნომერმა ჩოგბურთელმა ფინალში რეიტინგის ლიდერი, იტალიელი იანიკ სინერი ხუთ სეტში – 4:6, 6:7 (4:7), 6:4, 7:6 (7:3), 7:6 (10:2) დაამარცხა.
აღსანიშნავია, რომ ორი სეტის მოგების შემდეგ იანიკ სინერი მესამე სეტსაც დამაჯერებლად იგებდა და ანგარიშზე 5:4, საკუთარ ჩაწოდებაზე სამი მატჩპოინტი ჰქონდა, თუმცა ალკარასმა თამაშში დაბრუნება შეძლო, ჯერ სეტებში წონასწორობა აღადგინა, ხოლო ბოლო პარტია საჩემპიონო ტაიბრეიქზე მოიგო.
ალკარასისა და სინერის ფინალური მატჩი 5 საათსა და 29 წუთს გაგრძელდა. აღნიშნული ფინალი დიდი სლემის ტურნირების ისტორიაში მეორე ყველაზე ხანგრძლივია. 2012 წელს ავსტრალიაში ნოვაკ ჯოკოვიჩმა და რაფაელ ნადალმა 5 საათი და 53 წუთი ითამაშეს. ის მატჩი სერბმა ჩოგბურთელმა მოიგო.
შედეგად, 22 წლის ალკარასი დიდი სლემის ტურნირების ხუთგზის გამარჯვებულია. 2022 წელს მან ამერიკის ღია პირველობა მოიგო, 2023 და 2024 წლებში უიმბლდონის ჩემპიონი გახდა, ხოლო 2024 და 2025 წლებში პარიზში, როლან გაროსის გამარჯვებულად მოგვევლინა.
