საინტერესო იყო რუსეთის ეკონომიკური განვითარების მინისტრისგან იმის მოსმენა, რომ რუსეთის ეკონომიკა რეცესიის ზღვარზეა, რუსეთის გადახურებული ომის ეკონომიკა თავის ლიმიტებამდე მიდის. შესაბამისი განცხადება ევროკომისიის პრეზიდენტმა, ურსულა ფონ დერ ლაიენმა გააკეთა.
კერძოდ, მან ამის შესახებ დანიის ქალაქ ორჰუსში მედიასთან პრესკონფერენციაზე განაცხადა, რომელშიც, ასევე, მონაწილეობას იღებდნენ უკრაინის პრეზიდენტი ვოლოდიმირ ზელენსკი, დანიის პრემიერ-მინისტრი მეტე ფრიდერიკსენი და ევროპული საბჭოს პრეზიდენტი ანტონიო კოშტა.
“ყველამ ვიცით, რომ პუტინს მშვიდობა არ სურს, ასე რომ, მასზე ზეწოლა უნდა მოვახდინოთ, რათა მოლაპარაკებების მაგიდასთან დაჯდეს. სანქციების მე-18 პაკეტი რუსეთის ომის ეკონომიკას გულში ურტყამს.
საინტერესო იყო რუსეთის ეკონომიკური განვითარების მინისტრისგან იმის მოსმენა, რომ რუსეთის ეკონომიკა რეცესიის ზღვარზეა. საპროცენტო განაკვეთი 20%-ზეა, ინფლაცია 10%-ზეა. რუსეთის გადახურებული ომის ეკონომიკა თავის ლიმიტებამდე მიდის”, - განაცხადა ფონ დერ ლაიენმა.
მან მადლობა გადაუხადა დანიას უკრაინის მუდმივი მხარდაჭერისთვისა და აღნიშნა, რომ დარწმუნებულია, რომ საბჭოს დანიის თავმჯდომარეობის პერიოდში ეს მხარდაჭერა გაგრძელდება.
ევროკომისიის პრეზიდენტმა, ასევე, ევროკავშირის ვალდებულება გაიხსენა, რომლის თანახმად, წლის ბოლომდე უკრაინას 2 მილიონი ჭურვი უნდა მიაწოდოს. ფონ დერ ლაიენმა ასევე აღნიშნა, რომ ევროკავშირმა უკვე მოახდინა 2.1 მილიარდი ევროს ინვესტირება უკრაინის თავდაცვის გაძლიერებაში.
“მნიშვნელოვანია ამ სახსრების წარმომავლობა. ამას გაყინული რუსული აქტივების ჭარბი შემოსავლის გამოყენებით ვაკეთებთ. ამდაგვარად, ფაქტობრივად რუსეთი იხდის იარაღისთვის, რომელსაც უკრაინა იყენებს”, - განაცხადა ფონ დერ ლაიენმა.
