უკრაინის პრეზიდენტმა, ვოლოდიმირ ზელენსკიმ განაცხადა, რომ შეერთებულ შტატებში უკრაინის ელჩის თანამდებობაზე ამჟამინდელი თავდაცვის მინისტრის, რუსტემ უმეროვის კანდიდატურას განიხილავს.
„თუ მე გადავწყვეტ, და ეს ახლო მომავალში მოხდება, რომ ამერიკის შეერთებულ შტატებში ჩვენი მთავარი ელჩი იყოს თავდაცვის მინისტრი რუსტემ უმეროვი, ეს ნამდვილად გავლენას იქონიებს უკრაინის მთავრობაში სერიოზულ გადაადგილებებზე“, – აღნიშნა ზელენსკიმ ჟურნალისტებთან საუბრისას.
ამასთან, ზელენსკიმ დაადასტურა, რომ აშშ-ში უკრაინის ელჩის, ოქსანა მარკაროვას შეცვლას აპირებს. როგორც უკრაინის პრეზიდენტმა განმარტა, ის უკვე დაუკავშირდა მარკაროვას და მადლობა გადაუხადა მისი საქმიანობისთვის.
„ბევრი რამ სწორედ მისზე არის დამოკიდებული. ღია ვარ, მინდა, რომ მან უკრაინაში იმუშაოს. თუ ის სხვანაირად გადაწყვეტს, ეს მისი არჩევანი იქნება“, – აღნიშნა უკრაინის პრეზიდენტმა.
