„თავისუფლება მზია ამაღლობელს“, „დამხობა რეჟიმს“,- ამ შეძახილებით ბათუმის საქალაქო სასამართლოსთან შეკრებილები ბათუმის ქუჩებში საპროტესტო მსვლელობას მართავენ.
ისინი თავდაპირველად „ბათუმელების“ ოფისთან მივიდნენ, შემდეგ კი მსვლელობით გადაინაცვლეს საკონსტიტუციო სასამართლოსთან და აჭარის მთავრობის სახლთან. აქციის მონაწილეებმა გამსახურდიას ქუჩაზე საავტომობილო ნაწილი გადაკეტეს.
მსვლელობის მონაწილეები სკანდირებენ: „თავისუფლება სინდისის პატიმრებს“, „თავისუფლება მზია ამაღლობელს“, „დამხობა რეჟიმს“.
ბათუმელების“ მთავარმა რედაქტორმა, ეთერ თურაძემ მოსამართლე ირინა იმერლიშვილს მიმართა.
„ირინა იმერლიშვილს მივმართავ: არ გექმნებათ უხერხულობა, რომ თქვენ „უსაფრთხოებას“ იცავს, მზია ამაღლობელის პატიმრობაზე ერთ-ერთი პასუხისმგებელი პირი, ცრუ მოწმე გოჩა ვანაძე. არ გრცხვენიათ, რომ ის პოლიციელი გიცავთ, რომლის ცრუ ჩვენების საფუძველზე მზია ამაღლობელი მეშვიდე თვეა უკანონო პატიმრობაშია. თქვენი მიღებული გადაწყვეტილებებით, ჩვენი ქვეყანა ჯოჯოხეთში ჩააგდეთ. დარწმუნებული ვარ, აღნიშნულზე პასუხისმგებლობას არ გრძნობთ. ძალიან კომფორტულად აგრძელებთ ცხოვრებას და საქმიანობას. ასე ჩანს და ძალიან ვწუხვარ. ასეთი ცინიზმი და დამცირება, რასაც სისტემა ჩვენ მიმართ ახორციელებს, როგორ არ გიტოკავთ ნერვს თქვენ, თქვენს ოჯახს. როგორ აგრძელებთ ცხოვრებას?! თქვენ ხელი მოაწერეთ იმ წყეული კანონის დაკანონებას ხელი. თქვენ ვერ გექნებათ შესაძლებლობა, რომ მშვიდად იცხოვროთ, თქვენი თავი არ მოგცემთ ამის შესაძლებლობას, ამას დრო გიჩვენებთ“,- აღნიშნა თურაძემ.
ინფორმაციისთვის, მოსამართლე, ნინო სახელაშვილი „ბათუმელებისა“ და „ნეტგაზეთის“ დამფუძნებლის მზია ამაღლობელის სისხლის სამართლის საქმეზე გადაწყვეტილებას 6 აგვისტოს, 14:00 საათზე გამოაცხადებს. ამის შესახებ მან ბათუმის საქალაქო სასამართლოში სხდომაზე განაცხადა.
დღევანდელ სასამართლო სხდომაზე მზია ამაღლობელმა საბოლოო სიტყვით ისარგებლა. ინფორმაციისთვის, გამოცემა „ბათუმელებისა“ და „ნეტგაზეთის“ დამფუძნებელს გამოძიება პოლიციელზე თავდასხმას ედავება. მან ბათუმის პოლიციის უფროს ირაკლი დგებუაძეს სილა გააწნა.
IPN
