რუსული დრონების შეჭრა პოლონეთში არის გაფრთხილება მთელი ევროპისთვის, რუსულ დრონებს გაცილებით დიდი მანძილის დაფარვა შეუძლიათ, – ამის შესახებ უკრაინის პრეზიდენტმა, ვოლოდიმირ ზელენსკიმ ყოველდღიურ მიმართვაში განაცხადა.
მან პარტნიორებს რუსეთის წინააღმდეგ მკაცრი სანქციების დაწესებისკენ მოუწოდა, რაც უკრაინის პრეზიდენტის აზრით, აიძულებს პუტინს ომის დასრულებას.
„ყველა ხედავს, რომ რუსეთის ომი უკრაინის წინააღმდეგ პუტინის ომია. ყველა ხედავს, რომ რუსული დრონები პოლონეთის წინააღმდეგ ასევე პუტინის ომია და ეს გაფრთხილებაა არა მხოლოდ პოლონელებისთვის, არამედ ევროპაში ყველასთვის. რუსულ დრონებს შეუძლიათ გაცილებით დიდი მანძილის დაფარვა. ეს უკვე ძალიან გრძელი ომია რუსეთისთვის – მისი ამბიციებისთვის, მისი შესაძლებლობებისთვის, მისი ბიუჯეტისთვის, რაც ნიშნავს რუსულ ნავთობს, რუსულ გაზს, რუსულ ურანს, რუსულ რესურსებს, რითაც პუტინს ფულს შოულობს. მე ვთხოვ ყველა პარტნიორს, შეწყვიტონ საბაბების ძებნა, რომ არ დააწესონ ესა თუ ის სანქცია – ვთხოვ ყველას, ევროპას, შეერთებულ შტატებს, „დიდი შვიდეულის“ ქვეყნებს და „დიდი ოცეულის“ ქვეყნებს, მშვიდობა არის გზა, რომელიც უნდა გავიაროთ ომიდან მშვიდობამდე და სანქციები ამ გზის ნაწილია. თუ პუტინს არ სურს მშვიდობა, ის უნდა აიძულონ. პუტინის ომი დასრულდება მაშინ, როდესაც ის მას ვეღარ გააგრძელებს“, – განაცხადა ზელენსკიმ.
უკრაინის ლიდერმა ასევე თქვა, რომ უსაფრთხოების გარანტიების შესახებ საბაზისო დოკუმენტი უკვე ფაქტობრივად მზადაა და ახლა მიმდინარეობს დეტალების შემუშავება და ყველა პარტნიორთან შეთანხმება.
„ახლა კი ჩვენ რუსეთი უნდა ვაიძულოთ, დაასრულოს საბრძოლო მოქმედებები, დათანხმდეს შეხვედრის სამუშაო ფორმატს, ცეცხლი საიმედო შეწყვეტას, რათა რუსეთმა შეწყვიტოს მკვლელობები და დარტყმები. ეს შესაძლებელია მხოლოდ იმ შემთხვევაში, თუ ერთად ვიმოქმედებთ“, – თქვა ვოლოდიმირ ზელენსკიმ.
