მივმართავ ოპოზიციური პარტიების ამომრჩეველს: მეგობრებო, ძალიან გთხოვთ, კარგად დაფიქრდით, პროტესტი და არჩევნები ერთმანეთს ხელს არ უშლის. პროტესტში ვიქნებით ერთად, მაგრამ ამ არჩევნებს ნუ გამოტოვებთ, ნუ იქნებით პასიური დამკვირვებლები, - ამის შესახებ „ძლიერი საქართველო - ლელოს“ ლიდერმა, მამუკა ხაზარაძემ საზოგადოებასთან შეხვედრისა და საარჩევნო კლიპის პრეზენტაციის დროს განაცხადა.
მამუკა ხაზარაძის განცხადებით, ვინც არჩევნებზე არ მიდის, ის ეხმარება „ქართულ ოცნებას“, რადგან მისი ხმა პირდაპირ ეთვლება კახა კალაძეს.
„ჩვენ გვაქვს ერთი მიზანი და ეს მიზანი არ განსხვავდება იმ ხალხის მიზნისაგან, ვინც დღეს ბოიკოტშია, ვინც სხვა პოზიციაზეა. ამიტომ მე მინდა ყველას მოვუწოდო, ვინც დღეს ჩვენ გვისმენს, რომ უნდა გამოვიდეთ ამ არჩევნებზე და არ დავუთმოთ არცერთი ხმა „ქართულ ოცნებას“. ხმამაღლა ვამბობ, ვინც არჩევნებზე არ მიდის, ის ეხმარება „ქართულ ოცნებას“, ეს ასეა იმიტომ, რომ მისი ხმა პირდაპირ ეთვლება კალაძეს. მე არ მინდა, რომ რუსული „ოცნების“ გენერალური მდივანი უკვე მესამე ვადით მართავდეს თბილისს, ეს არის სირცხვილი. არ შეიძლება ამ ადამიანმა და ამ კლანმა მართოს ასეთი კორუმპირებული მეთოდებით ჩვენი ქვეყანა და ჩვენ ჯიბეში და ჩვენს ბიუჯეტში ხელები აფათუროს.
როცა ასეთი საკითხები დგება, ძალიან მნიშვნელოვანია, რომ ზეპარტიული გადაწყვეტილება მიიღო. ჩვენთვის ის ხელშეკრულება და მემორანდუმი, [პარტიასთან] „გახარიას საქართველოსთვის“ გავაფორმეთ, ეს არის პარტიის ზემოთ დადებული მემორანდუმი. ჩვენ აქ სამშობლოზე ვლაპარაკობთ, ჩვენ ქვეყანაზე ვლაპარაკობთ და პირადი წყენები და ამბები უნდა გადავდოთ. ყველაფერს თავისი სახელი დაერქმევა, მაგრამ დღეს ჩვენ გადასარჩენი გვაქვს თბილისი და ის მუნიციპალიტეტები და ქალაქები, პირველ რიგში, რომელიც მოგებული გვაქვს“, - განაცხადა მამუკა ხაზარაძემ.
