უკრაინის პრეზიდენტი ვოლოდიმირ ზელენსკი აცხადებს, რომ ქვეყანაში კორუფციაში ჩართული პირები უნდა დაისაჯონ. ამის შესახებ მან ყოველდღიურ ვიდეომიმართვაში განაცხადა.
ვოლოდიმირ ზელენსკის თქმით, აუცილებელია ეფექტური ქმედება კორუფციის წინააღმდეგ.
„მაღალჩინოსნებმა უნდა იმუშაონ ანტიკორუფციულ ბიუროსთან, სამართალდამცავ ორგანოებთან ერთად და უნდა იმუშაონ ისე, როგორც საჭიროა შედეგისთვის“, – თქვა ზელენსკიმ.
შეგახსენებთ, რომ უკრაინის ანტიკორუფციულმა ბიურომ გამოავლინა 100 მილიონი დოლარის ქრთამის სქემა ენერგეტიკულ სექტორში. ჯგუფი, რომელშიც შედიოდა ენერგეტიკის მინისტრის ყოფილი მრჩეველი და უკრაინის სახელმწიფო ბირთვული კომპანიის, „ენერგოატომის“ უსაფრთხოების უფროსი, აკონტროლებდა შესყიდვებს და აიძულებდა კონტრაქტორებს, გადაეხადათ უკანონო მოსაკრებლები. 15 თვის განმავლობაში მიმდინარე გამოძიებამ ათობით ჩხრეკა ჩაატარა და სხვადასხვა ვალუტაში დიდი რაოდენობით ნაღდი ფული ამოიღო. „ენერგოატომმა“ დაადასტურა, რომ მის ოფისებში ჩხრეკა ჩატარდა და ხელისუფლებასთან თანამშრომლობის შესახებ თანხმობა განაცხადა.
