აშშ-ის პრეზიდენტის, დონალდ ტრამპის განცხადებით, არ დაუშვებს, რომ ირანი ბირთვულ იარაღს ფლობდეს.
აღნიშნულის შესახებ ტრამპმა კონგრესში სიტყვით გამოსვლისას ისაუბრა და აღნიშნა, რომ თეირანთან მოლაპარაკებები ამ დრომდე მიმდინარეობს და ის პრიორიტეტს საკითხის დიპლომატიური გზით მოგვარებას ანიჭებს.
„მე ყველგან დავამკვიდრებ მშვიდობას, სადაც შესაძლებელია და არ მოვერიდები, წინ აღვუდგე საფრთხეებს ამერიკის წინააღმდეგ ყველგან, სადაც საჭიროა. სწორედ ამიტომ, გასულ ივნისს აშშ-ის შეიარაღებულმა ძალებმა გაანადგურა ირანის ბირთვული იარაღის პროგრამა ირანის ტერიტორიაზე დარტყმებით, რომელიც ცნობილია „შუაღამის ჩაქუჩის“ სახელით. ათწლეულების განმავლობაში აშშ-ის პოლიტიკა იყო, არ დაეშვა ბირთვული იარაღის მოპოვება. მას შემდეგ რაც, 47 წლის წინ ამაყ ერზე კონტროლი მოიპოვეს, რეჟიმსა და მის მკვლელ მარიონეტებს, ტერორიზმის, სიკვდილისა და სიძულვილის გარდა არაფერი გაუვრცელებიათ“, – განაცხადა ტრამპმა.
დონალდ ტრამპის თქმით, ირანის ხელისუფლება ხოცავდა და ასახიჩრებდა ათასობით ამერიკელ სამხედროს, ასობით ათასსა და მილიონ ადამიანს გზაზე დამონტაჟებული ბომბებით. აშშ-ის პრეზიდენტმა ასევე გაიხსენა გენერალი სოლეიმანი, რომელიც მისი პირველი ვადის დროს იქნა ლიკვიდირებული. ტრამპმა ის გზებზე დამონტაჟებული ნაღმების მეფედ მოიხსენია, რომლის ლიკვიდირებასაც მნიშვნელოვანი გავლენა ჰქონდა.
დონალდ ტრამპმა ასევე ისაუბრა გასულ თვეს, ირანში გამართულ მასშტაბურ საპროტესტო აქციებზე, სადაც, მისი თქმით, 32 000 დემონსტრანტი მოკლეს.
„ისინი ცეცხლს უხსნიდნენ, ჩამოახრჩობდნენ მათ. ჩვენ შევაჩერეთ მრავალი მათგანის ჩამოხრჩობა სერიოზული მუქარით. ეს საშინელი ხალხია. მათ უკვე განავითარეს რაკეტები, რომელთაც შეუძლია, საფრთხე შეუქმნან ევროპას და ჩვენ საზღვარგარეთულ ბაზებს, ისინი მუშაობენ რაკეტის შესაქმნელად, რომელიც მალე მიაღწევს აშშ-ს. „შუაღამის ჩაქუჩის“ შემდეგ, ისინი გააფრთხილეს, რომ მომავალში არ ჰქონოდათ მცდელობა, აღედგინათ ბირთვული პროგრამა, კერძოდ, ბირთვული იარაღზე მუშაობა, თუმცა ისინი თავიდან იწყებენ. გავანადგურეთ და კვლავ თავიდან იწყებენ“, – აღნიშნა ტრამპმა.
დონალდ ტრამპის თქმით, ამ ფონზე ისინი მოლაპარაკებებს აწარმოებენ თეირანთან, თუმცა ამ დრომდე არ მოუსმენიათ „საიდუმლო სიტყვები“: „ჩვენ არასდროს გვექნება ბირთვული იარაღი“.
„მირჩევნია ეს საკითხი დიპლომატიურად გადავჭრათ, მაგრამ ერთი რამ ეჭვგარეშეა, მე არასდროს დავრთავ ნებას, ტერორიზმის მსოფლიო ნომერ პირველ სპონსორს, ჰქონდეს ბირთვული იარაღი. ეს არ მოხდება“, – აღნიშნა ტრამპმა.
როგორც ტრამპმა აღნიშნა, არავის უნდა შეეპაროს ეჭვი ამერიკის ძლევამოსილებასა და სამხედრო შესაძლებლობებში.
