დონალდ ტრამპმა ბრიტანეთის მეფისა და დედოფლის პატივსაცემად შოტლანდიურ ვისკიზე ტარიფები გააუქმა

აშშ-ის პრეზიდენტმა, დონალდ ტრამპმა სოციალურ ქსელში დაწერა, რომ ბრიტანეთის მეფისა და დედოფლის პატივსაცემად აშშ შოტლანდიურ ვისკიზე ტარიფებს გააუქმებს.

მისივე თქმით, შეზღუდვების მოხსნა ბიზნესს „ძალიან მნიშვნელოვნად“ დაეხმარება.

„მეფემ და დედოფალმა ისეთი რამის გაკეთება მაიძულეს, რისი გაკეთებაც სხვას არავის შეეძლო, თანაც თხოვნის გარეშე! დიდი პატივია, რომ ისინი აშშ-ში იმყოფებიან“, – განაცხადა ტრამპმა.

ამასთან, დონალდ ტრამპმა გაერთიანებული სამეფოს მეფე ჩარლზი შეაქო და განაცხადა, რომ პრემიერ-მინისტრმა კირ სტარმერმა მისგან უნდა ისწავლოს.

„თქვენმა პრემიერ-მინისტრმა უნდა ისწავლოს ისე მოქცევა, როგორც მეფე იქცევა და ამით ის ბევრ უკეთეს რამეს გააკეთებს“, – განაცხადა ტრამპმა.

მედიასთან საუბრისას აშშ-ს პრეზიდენტმა აღნიშნა, რომ არ იცის, დაეხმარება თუ არა მეფე ჩარლზის ოფიციალური ვიზიტი კირ სტარმერთან ურთიერთობის გაუმჯობესებაში.

„ამაზე პასუხს ვერ გაგცემთ. ერთი რამ შემიძლია გითხრათ, ჩვენი ურთიერთობა ძალიან კარგია, მაგრამ იცით, სხვანაირი პიროვნებაა, ჩვენ ამას გავარკვევთ. მე ძალიან მომწონს კირ სტარმერი, მაგრამ ვფიქრობ, რომ მან ტრაგიკული შეცდომა დაუშვა იმიგრაციასა და ენერგეტიკის საკითხებთან დაკავშირებით“, – განაცხადა ტრამპმა.