საქართველომ მრავალვექტორული პოლიტიკა აირჩია, - ამის შესახებ რუსეთის საგარეო საქმეთა სამინისტროს პრესსპიკერმა მარია ზახაროვამ ბრიფინგზე განაცხადა.
რუსეთის საგარეო საქმეთა სამინისტროს პრესსპიკერმა საქართველოსთან ურთიერთობის შესახებ დასმულ შეკითხვას უპასუხა.
„რაც შეეხება საქართველოს. ცნობილი აზრთა სხვადასხვაობის მიუხედავად, ვცდილობთ, რომ ამ ქვეყანასთან კავშირები პრაგმატიზმისა და თანასწორობის პრინციპებზე დაყრდნობით განვავითაროთ. წარსულში ჩვენ შორის არსებული მდიდარი, პოზიტიური და შესანიშნავი გამოცდილების გათვალისწინებით. ევროკავშირის მხრიდან თავხედური მცდელობების მიუხედავად, რომ თბილისს თავს მოახვიოს მოსკოვის მიმართ კონფრონტაციული კურსი, დააწესოს ანტირუსული სანქციები და მარტივად რომ ვთქვათ, საკუთარი ინტერესები დასავლეთის პოლიტიკურ სიგიჟეს შესწიროს, საქართველომ მრავალვექტორული პოლიტიკა აირჩია“, - განაცხადა ზახაროვამ.
ზახაროვამ ეკონომიკური თანამშრომლობის საკითხებზეც ისაუბრა.
„ჩვენს ქვეყნებს შორის ეკონომიკური თანამშრომლობა აქტიურად ფართოვდება. გასულ წელს სავაჭრო ბრუნვამ რეკორდულ 2.7 მილიარდი დოლარის მაჩვენებელს მიაღწია. რუსეთიდან ტურისტების რაოდენობამ კი სულ 1.4 მილიონი ადამიანი შეადგინა. ჩვენი ქვეყანა საქართველოსთვის კვლავ საკვანძო საექსპორტო ბაზრად და სტრატეგიულად მნიშვნელოვანი პროდუქციის, ენერგომატარებლებისა და მარცვლეულის, წამყვან მიმწოდებლად რჩება. ვცდილობთ ყველა პირობა შევქმნათ ჩვენს ხალხებს შორის ჰუმანიტარული კონტაქტების განვითარებისთვის, რომელთაც საერთო ღირებულებები და მრავალწლიანი ისტორიული და კულტურული კავშირები აერთიანებთ“, - აღნიშნა რუსეთის საგარეო საქმეთა სამინისტროს პრესსპიკერმა.
