აშშ-ის პრეზიდენტ დონალდ ტრამპის განცხადებით, უკრაინის პრეზიდენტ ვოლოდიმირ ზელენსკის რუსეთის ნავთობგადამამუშავებელ ქარხნებზე თავდასხმების შემცირება სთხოვა და მისგან დადებითი პასუხი მიიღო.
საწვავის ფასების ზრდაზე საუბრისას ტრამპმა განაცხადა, რომ პრობლემის ერთ-ერთი მთავარი მიზეზი უკრაინის მიერ რუსეთის ნავთობგადამამუშავებელ ინფრასტრუქტურაზე განხორციელებული დარტყმებია.
„მთავარი პრობლემა ის არის, რომ რუსეთის ნავთობგადამამუშავებელ ქარხნებს აფეთქებენ“, - აღნიშნა აშშ-ის პრეზიდენტმა.
მისი თქმით, საწვავის ფასებთან დაკავშირებული ვითარება მხოლოდ ახლო აღმოსავლეთში მიმდინარე მოვლენებით არ არის განპირობებული.
„ეს სინამდვილეში ახლო აღმოსავლეთის პრობლემა არ არის. ეს უფრო რუსეთის პრობლემაა, სადაც უკრაინა და რუსეთი ერთმანეთს ებრძვიან და უკრაინა რუსეთში დიზელის ნავთობგადამამუშავებელ ქარხნებს აფეთქებს, რადგან ისინი ნავთობგადამუშავების მნიშვნელოვან ნაწილს წარმოადგენენ“, - განაცხადა ტრამპმა.
აშშ-ის პრეზიდენტის თქმით, აღნიშნულ საკითხზე ზელენსკის პირადად ესაუბრა.
„პრეზიდენტ ზელენსკის ვესაუბრე და ვუთხარი: „ნავთობგადამამუშავებელ ქარხნებზე თავდასხმები უნდა შეამციროთ“. მან მითხრა: „ალბათ, ასე მოვიქცევით““, - აღნიშნა ტრამპმა.
უკრაინის პრეზიდენტის მხრიდან აღნიშნულ შეთანხმებაზე დამოუკიდებელი დადასტურება გავრცელებულ ინფორმაციაში არ არის წარმოდგენილი.
