სააკაშვილი სოციალურ ქსელში წერს, რომ, მისი ვერსიით, ივანიშვილის უკმაყოფილება ძმები ფეიქრიშვილების მიერ ციხიდან გავრცელებულმა წერილებმა გამოიწვია, რის შემდეგაც მათზე ძალადობა წინასწარ დაიგეგმა.
„ჩემთვის უკვე დღესავით ნათელია, თუ რა მოხდა. ივანიშვილს არ მოეწონა ძმები ფეიქრიშვილების წერილები ციხიდან. ბერას უახლოეს სამეგობროს, კაწროს და ყიფიანს უთხრეს, როგორც გინდათ, ისე მოაგვარეთ ეს ამბავიო. ამათაც მიგვიშვით ფეიქრიშვილებთან და მერე ჩვენ ვიცითო“, – წერს სააკაშვილი.
ყოფილი პრეზიდენტი ამტკიცებს, რომ ვაკის პარკის კაფეში მომხდარი დაპირისპირება დადგმული იყო და მისი მიზანი კონკრეტული პირების დაკავება და შემდგომ დავით ფეიქრიშვილთან ერთ პენიტენციურ დაწესებულებაში მოთავსება გახდა.
„დადგეს ვაკის პარკის კაფეში ძალიან იაფფასიანი სცენა, ვითომ ჩხუბის. დადგმული რომაა, კადრებშიც კარგად ჩანს. მერე ესენი ვითომ დაიჭირეს, მიუშვეს ციხეში და იქ სასტიკად გაუსწორდნენ ივანიშვილის გაბრაზებულ ფეიქრიშვილებს, რომელთა საკანში რატომღაც სათვალთვალო კამერა არ აღმოჩნდა“, – აცხადებს სააკაშვილი.
მისივე შეფასებით, აღნიშნული შემთხვევა პატიმრებზე ზეწოლის შესაძლებლობის დემონსტრირებას ემსახურება.
„გაფრთხილებდით მე, ივანიშვილი „ბესპრედელშიკია“-მეთქი და უმრავლესობას ეს გადაჭარბება ეგონა. ჰოდა, იხილეთ, როგორ გამოიყურება „ბესპრედელი“. ამით ყველას ეუბნება – „ჯერ ციხეში ჩაგსვამთ და მერე იქ იქნებით ყველაზე დაუცველიო“ და ეს მხოლოდ დასაწყისია, თუ ჩვენ თვითონ არ დავუსვით დასასრული“, – წერს მიხეილ სააკაშვილი.
დავით ფეიქრიშვილის საქმეზე ურთიერთგამომრიცხავი განცხადებები ვრცელდება
გლდანის მე-8 პენიტენციურ დაწესებულებაში დავით ფეიქრიშვილის მიმართ სავარაუდო ძალადობის შესახებ თავდაპირველად მისმა ადვოკატმა პაატა გოიაშვილმა განაცხადა.
ადვოკატის ინფორმაციით, დავით ფეიქრიშვილის საკანში შეასახლეს ვატო ყიფიანი, ავთანდილ ბილანიშვილი, მეტსახელად „კაწრო“, შოთა ყიფიანი და კიდევ ორი ბრალდებული, რომლებმაც მის მიმართ ფიზიკური ძალადობა განახორციელეს.
გოიაშვილის მტკიცებით, ფეიქრიშვილმა სხეულის მრავლობითი დაზიანება, მათ შორის მოტეხილობები მიიღო. ადვოკატი აცხადებს, რომ სავარაუდო თავდამსხმელები მისგან მობილური ტელეფონის კოდს ითხოვდნენ.
მისივე ინფორმაციით, ძმის სიცოცხლის გადასარჩენად გოგა ფეიქრიშვილმა, რომელიც იმავე დაწესებულებაში, თუმცა სხვა საკანში იმყოფება, ვენები გადაიჭრა.
სპეციალური პენიტენციური სამსახური დავით ფეიქრიშვილის მიმართ თანამესაკნეების მხრიდან ძალადობის ფაქტს უარყოფს.
უწყების განცხადებით, ფეიქრიშვილი ადვოკატთან შეხვედრისას მოულოდნელად გავიდა ოთახიდან, დერეფანში ფანჯრის მინა ჩაამტვრია და თვითდაზიანებით იმუქრებოდა.
დავით ფეიქრიშვილთან საკანში მოთავსებასა და მასთან კონფლიქტს უარყოფს ვატო ყიფიანიც. მისი ადვოკატის განცხადებით, ყიფიანი გავრცელებულ ბრალდებებს კატეგორიულად გამორიცხავს და მიიჩნევს, რომ გარემოებები გამოძიებამ უნდა დაადგინოს.
დავით ფეიქრიშვილის ჯანმრთელობის დაზიანების ფაქტზე გამოძიება იუსტიციის სამინისტროს გენერალური ინსპექციის საგამოძიებო სამმართველომ დაიწყო.
მიხეილ სააკაშვილის მიერ ბიძინა ივანიშვილისა და სხვა პირების მისამართით გამოთქმული ბრალდებები ამ ეტაპზე დადასტურებული არ არის.
