შსს-ს ცნობით, ჩატარებული ოპერატიული ღონისძიებებისა და ფარული საგამოძიებო მოქმედებების შედეგად დადგინდა, რომ ადვოკატმა მისი დაცვის ქვეშ მყოფი მსჯავრდებულის დას თავდაპირველად 10 000 ლარი მოსთხოვა. იგი ქალს არწმუნებდა, რომ თანხას ცენტრალური კრიმინალური პოლიციის დეპარტამენტის თანამშრომლებს გადასცემდა, რომლებიც სანაცვლოდ მისი ძმის საქმეზე საპროცესო შეთანხმების გაფორმებას უზრუნველყოფდნენ.
გამოძიების ვერსიით, მოგვიანებით ადვოკატმა ქალს დამატებით 100 000 ლარი მოსთხოვა. მისი მტკიცებით, ამ თანხიდან 40 000 ლარი პროკურატურისთვის უნდა გადაეცა, რათა საპროცესო შეთანხმება უკეთესი პირობებით გაფორმებულიყო, ხოლო დარჩენილი 60 000 ლარი სახელმწიფო ბიუჯეტში უნდა ჩარიცხულიყო.
შინაგან საქმეთა სამინისტროს ინფორმაციით, მსჯავრდებულის ოჯახის წევრმა ადვოკატს მოთხოვნილი თანხიდან 10 000 ლარი გადასცა, რის შემდეგაც სამართალდამცველებმა იგი დააკავეს.
გამოძიება საქართველოს სისხლის სამართლის კოდექსის 180-ე მუხლის მე-2 ნაწილით – თაღლითობის ბრალდებით მიმდინარეობს, რაც შვიდ წლამდე ვადით თავისუფლების აღკვეთას ითვალისწინებს.
