პრეზიდენტის ვიზიტს ჰქონდა აშკარად გამოხატული ოფიციალური ვიზიტის ნიშნები და არა კერძოსი. ზოგი ამბობს, რომ არ შეიძლება, კერძო ვიზიტი შეფასებული იყოს, როგორც ოფიციალური. უამრავი დეტალია, რაზეც საკონსტიტუციო სასამართლომ საკუთარი დასკვნა უნდა გააკეთოს, - ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.
მისი თქმით, აღნიშნული პროცესის სკანდალურად განხილვა, სწორი არ არის.
„პოლიტიკური პარტიები ამბობენ, ეს არის პრეზიდენტის დასჯა, დაპირისპირება. რასაკვირველია, აზრთა დაპირისპირებაა არის, მაგრამ არ შეიძლება, საკონსტიტუციო სასამართლოში წარსადგენი სარჩელი ჩაითვალოს ვინმეს დასჯად, რადგან არსებობს კონსტიტუცია და კონსტიტუციასთან შესაბამისობაში ამა თუ იმ ლიდერის მოქმედება არის ის საკითხი, რომელიც ქვეყანას აინტერესებს, რათა ისეთი ტენდენცია არ განვითარდეს, როცა კონსტიტუციის დარღვევა ჩვეულებრივ ნორმად იქცევა. ამ პროცესს სკანდალად ნუ განიხილავთ, ეს არის ნორმალური დემოკრატიული პროცესი", - განაცხადა ვოლსკიმ.
