თბილისის ბაგა-ბაღებში უკრაინიდან ჩამოსული 12 ოჯახის სკოლამდელი ასაკის ბავშვი ჩაირიცხა. აღნიშნულის შესახებ „ინტერპრესნიუსს" თბილისის საბავშვო ბაგა-ბაღების მართვის სააგენტოში განუცხადეს.
მათივე ინფორმაციით, ბაღების მართვის სააგენტო და ბაღების პერსონალი, სრულად არის მობილიზებული, რომ უკრაინიდან საქართველოში ჩამოსულ ბავშვებს უცხო გარემოსთან ადაპტაცია გაუმარტივდეთ. ამასთან, სააგენტო აგრძელებს უკრაინის მოქალაქეთა განცხადებების მიღებას შვილების ბაღებში რეგისტრაციასთან დაკავშირებით.
ცნობისთვის, უკრაინელი მოქალაქეებისთვის საჯარო ბაღებში რეგისტრაციის გამარტივების შესახებ ქალაქის მერის ინიციატივა თბილისის საკრებულომ 18 მარტს დაამტკიცა. კერძოდ, საქართველოში 1-ელი იანვრიდან შემოსული 2-დან 6 წლამდე ასაკის უკრაინელი ბავშვები, საჯარო ბაგა-ბაღებში ელექტრონული რეგისტრაციის და ბინადრობის ნებართვის გარეშე ჩაირიცხებიან.
