არ შეიძლება, არ დავუფასოთ გიორგი გახარიას გონივრული ნაბიჯი, რადგან ჩვენ მუდმივად ხაზს ვუსვამდით, რომ ჩვენი პროტესტი იყო სამართლიანი, - ამის შესახებ საქართველოს პირველ არხს „რესპუბლიკური პარტიის" წევრმა თამარ კორძაიამ განუცხადა.
მისი თქმით, ოპოზიცია ითხოვდა სწორედ იმას, რომ არ დაეკავებინათ ოპოზიციური პარტიის ლიდერი.
კორძაიას განცხადებით, ოპოზიციის მშვიდობიანმა პროტესტმა და დაუღალავმა შრომამ პირველი შედეგი გამოიღო.
„წითელი ხაზი რიგგარეშე არჩევნების თემის შემდეგ იყო ნიკა მელიას დაკავების საკითხი. არ შეიძლება, არ დავუფასოთ გიორგი გახარიას ეს გონივრული ნაბიჯი, რადგან ჩვენ მუდმივად ხაზს ვუსვამდით იმას, რომ ჩვენი პროტესტი იყო სამართლიანი და ვითხოვდით, რომ ოპოზიციური პოლიტიკური პარტიის ლიდერის დაკავება არ მომხდარიყო. დარწმუნებული ვიყავით, ვერ მოხდებოდა. ამიტომ, ვფიქრობთ, რომ „ქართული ოცნების" იმ ლიდერებმა, რომლებმაც დღეს განცხადება გააკეთეს, იქნებ იფიქრონ უფრო მეტი, რომ მათაც გადმოდგან კონსტრუქციული ნაბიჯები და დავიწყოთ მოლაპარაკებები რიგგარეშე არჩევნებთან დაკავშირებით. ეს არის ყველაზე მნიშვნელოვანი, რადგან პირველი და მთავარი დღეს ნიკა მელიას ადვოკატმა გაახმოვანა, რომ აუცილებელია, პროკურატურამ დასვას საკითხი პატიმრობის გაუქმებასთან დაკავშირებით. ამასთან, აუცილებელია დავიწყოთ მოლაპარაკებები და „ქართული ოცნება" წამოვიდეს რეალურ მოლაპარაკებებზე, გადმოდგან ნაბიჯი. ოპოზიციის მშვიდობიანმა პროტესტმა და დაუღალავმა შრომამ, რომ ჩვენ მხარეს იყო სიმართლე და ვიცავდით მილიონ 200 000 ამომრჩევლის ხმას, ამ შემთხვევაში, პირველი შედეგი გამოიღო. ჩვენ ასევე მშვიდობიანად მოვითხოვთ ამ ქვეყნის წინსვლასა და განვითარებას. პირველი, უნდა მოიხსნას კრიზისი ნიკა მელიას დაკავებასთან დაკავშირებით და შემდგომ უნდა დავიწყოთ საუბრები არჩევნებზე", - განაცხადა თამარ კორძაიამ.
საქართველოს პრემიერ-მინისტრი გიორგი გახარია გადადგა. ამის შესახებ გიორგი გახარიამ მთავრობის ადმინისტრაციაში გამართულ საგანგებო ბრიფინგზე განაცხადა.
