ცხინვალის საოკუპაციო რეჟიმის დე ფაქტო პრეზიდენტი, ანატოლი ბიბილოვი ამბობს, რომ რუსეთის შემადგენლობაში შესვლის შემთხვევაში "სამხრეთ ოსეთი" ჩრდილოეთ ოსეთის რეგიონთან უნდა გაერთიანდეს. ამის შესახებ მან რუსულ სახელისუფლებო არხთან ისაუბრა.
"ალანია უკვე გვაქვს: ჩრდილოეთ ოსეთიც ალანიაა და სამხრეთ ოსეთიც - ალანიის სახელმწიფო. ეს უკვე ერთი ალანიაა. როდესაც რუსეთის შემადგენლობაში ვიქნებით, არის პროცედურები, რომელიც სუბიექტების გაერთიანებასთან არის დაკავშირებით. ამჟამად სამხრეთ ოსეთი შესაძლოა რუსეთის შემადგენლობაში შევიდეს, როგორც რუსეთის სუბიექტი. ვფიქრობ, ოსეთის გაერთიანება აუცილებელია", - თქვა ბიბილოვმა.
30 მარტს ცხინვალის საოკუპაციო რეჟიმის დე ფაქტო პრეზიდენტმა, ანატოლი ბიბილოვმა განაცხადა, რომ რუსეთთან გაერთიანება "რესპუბლიკის" სტრატეგიული მიზანია. აღნიშნულ საკითხზე ოკუპირებულ რეგიონში რეფერენდუმის ჩატარებას აპირებენ.
