იმუნიზაციის ტექნიკურ მრჩეველთა ეროვნული ჯგუფის ხელმძღვანელის ივანე ჩხაიძის განცხადებით, პანდემიის დასრულებაზე საუბარი ჯერ ადრეა.
მისივე თქმით, გარდა იმისა, რომ ქვეყანაში კვლავ ფიქსირდება ინფიცირება და კორონავირუსით გარდაცვალების ახალი შემთხვევები, არ შეიძლება საუბარი პანდემიის დასრულებაზე, ვიდრე კორონავირუსის ახალი მუტაციის გამოჩენის ალბათობა არსებობს.
„ჯერ ადრეა საუბარი, რომ საქართველოში პანდემია დასრულდა ან დასასრულს უახლოვდება. ვიდრე ინფიცირებულთა და გარდაცვალების შემთხვევების რაოდენობა სტაბილურად არ მცირდება, უნდა ვთქვათ, რომ პანდემიის დასრულება ჯერ შორს არის. არ შეიძლება საუბარი, პანდემიის დასრულებაზე, ვიდრე არ ვიქნებით დარწმუნებული, რომ კორონავირუსის ახალი მუტაციის გამოჩენის ალბათობა არ არსებობს. ჯერჯერობით ჯანდაცვის მსოფლიო ორგანიზაცია არ აფიქსირებს ამ ფაქტს.
ბოლო ორი დღის განმავლობაში მსოფლიოს სხვადასხვა ქვეყანაში კორონავირუსის სამი ახალი ვარიანტი გამოჩნდა. „ომიკრონმა“ თავისი მუტაციის მაქსიმუმი ჯერ არ ამოწურა, ვირუსის შემდგომი მუტაციის რისკი არსებობს. ვიდრე მსოფლიოს ყველა ქვეყანაში არ იქნება ისეთი სტაბილური მდგომარეობა, როგორც საქართველოში, პანდემიის დასასრულზე საუბარი არ უნდა იყოს. ბევრი ევროპული ქვეყანა, სამხრეთ კორეა, ჰონგ-კონგი აფიქსირებს შემთხვევების მატებას ისეთივე სახით, რა სახითაც საქართველოში იყო იანვრის ბოლოს და თებერვლის დასაწყისში. ამ შემთხვევების უკან „ომიკრონის“ მეორე ვარიანტი დგას, ანალოგიური მატებაა აშშ-ში. ასე რომ, გლობალურად პანდემიის დასასრულზე ლაპარაკი ნაადრევია, თუმცა ქვეყანაში არსებული მდგომარეობა ძალიან მნიშვნელოვნად არის გაუმჯობესებული, სტაბილურია და მოლოდინი გვაქვს, რომ მომდევნო დღეების, კვირების მანძილზე შემცირება კიდევ იქნება“, – განაცხადა ივანე ჩხაიძემ.
