ბრიტანული მედიის ცნობით, ვლადიმირ პუტინმა 100 ათასამდე უკრაინელი ლტოლვილი რუსეთის შორეულ ადგილებში გადაასახლა, მათ შორის, ციმბირსა და არქტიკულ წრეში.
The Independent და The i წერენ, რომ ამ ინფორმაციას კრემლის მიერ გამოქვეყნებულ დოკუმენტებზე დაურდნობით ავრცელებენ.
მედიის ცნობით, მოსკოვმა გასულ თვეში გამოსცა სასწრაფო ბრძანება, რომლის მიხედვითაც, რუსეთის, უკრაინის კონტროლირებადი ტერიტორიის და დონეცკის და ლუგანსკის ოკუპირებული ტერიტორიების 95 739 მცხოვრები თავიანთი სახლებიდან 5 500 მილის მანძილზე უნდა გადაესახლებინათ.
The i-ის ცნობით, რუსეთის მთავრობის ბრძანებულებით, 11 ათასი ადამიანი გაგზავნილია ციმბირში, 7 ათასი - შორეულ აღმოსავლეთში და 7 ათასი - ჩრდილოეთ კავკასიაში. The i-ის წყაროების თანახმად, უკრაინელები გადაასახლეს ჩეჩნეთში, ინგუშეთსა და დაღესტანში. ასევე, ნაწილი გაგზავნილია კურილიის კუნძულებზე, რომელიც რუსეთის მიერ იაპონიისგან არის ოკუპირებული.
Independent წერს, რომ ეს ყოველივე ხდება არაერთი გავრცელებული ცნობის ფონზე იმის შესახებ, რომ ქრებიან რუსული ძალების მიერ უკანონოდ დაკავებული ადამიანები.
გამოცემის ცნობით, მოსკოვის განკარგულებაში წერია, რომ "უკრაინაში არსებული ვითარების გათვალისწინებით", რუსეთის ფედერაცია "ამტკიცებს მოქალაქეების განაწილებას რუსეთის ფედერაციის შემადგენელ სუბიექტებზე" და ითხოვს 95 739 ადამიანის მიღების უზრუნველყოფას.
The i-ის ცნობით, საპორტო ქალაქ მარიუპოლში მოქალაქეებს აიძულებდნენ, ხელი მოეწერათ დოკუმენტებზე, რომელშიც ნათქვამია, რომ მათი ქალაქი უკრაინის ჯარებმა დაბომბეს. წინააღმდეგ შემთხვევაში, მათ დევნით ემუქრებოდნენ და ეუბნებოდნენ, რომ უკრაინაში ვერასდროს დაბრუნდებოდნენ.
