საოკუპაციო არმია სადესანტო-საზღვაო ოპერაციას ამზადებს, – ამის შესახებ უკრაინის შეიარაღებული ძალების გენერალური შტაბის ოპერატიულ ინფორმაციაშია ნათქვამი.
„საზღვაო ქვეითი კორპუსის 810-ე და 155-ე ცალკეული ბრიგადების ქვედანაყოფები საზღვაო-სადესანტო ოპერაციისთვის ემზადებიან. ინფორმაცია ზუსტდება“, – ნათქვამია გენშტაბის ცნობებში.
გენერალური შტაბის ინფორმაციით, პარალელურად, გრძელდება რუსული შენაერთების მოძრაობა უკრაინის ტერიტორიისკენ რუსეთის კურსკის, ბრიანსკის და ვორონეჟის რეგიონებიდან. რუსეთის ფედერაციის შეიარაღებული ძალების ქვედანაყოფებს, რომლებიც უკრაინის ტერიტორიაზე არიან, უზრუნველყოფის მნიშვნელოვანი პრობლემები აქვთ. ამასთან, მათ შეძლეს საბრძოლო მასალის მნიშვნელოვანი მარაგების დაგროვება.
„პირდაპირი კონტაქტის ხაზზე მყოფი ოკუპანტების ქვედანაყოფებში პერსონალის უკმაყოფილება იზრდება, ხოლო მორალური და ფსიქოლოგიური მდგომარეობა დაბალ დონეზე რჩება. რუსი სამხედროები მუდმივად უჩივიან როტაციის ნაკლებობას, მუდმივად მწყობრიდან გამოსულ აღჭურვილობას, საწვავისა და საკვების ხარისხს. ბელარუსის რესპუბლიკის შეიარაღებული ძალების გარკვეული ქვედანაყოფები აგრძელებენ დავალებების შესრულებას უკრაინა-ბელარუსის საზღვრის გადასაფარად, ბრესტისა და გომელის რეგიონების ტერიტორიებზე. დროებით ოკუპირებულ ტერიტორიებზე რუსი სამხედროები აგრძელებენ ძარცვას და ძალადობრივ ქმედებებს მშვიდობიანი მოსახლეობის წინააღმდეგ. ეს ქმედებები წახალისებულია მათი სამხედრო ხელმძღვანელობის ბრძანებით. აღსანიშნავია, რომ რუსული სარაკეტო კრეისერის „მოსკოვის“ განადგურების შემდეგაც კი, რუსეთი საზღვაო სივრცის კონტროლს აგრძელებს“, – ნათქვამია გავრცელებულ ინფორმაციაში.
