ევროკავშირი გმობს რუსეთის შეიარაღებული ძალების განურჩეველ და უკანონო დარტყმებს მოქალაქეებსა და სამოქალაქო ინფრასტრუქტურაზე, – ამის შესახებ ნათქვამია საგარეო პოლიტიკისა და უსაფრთხოების საკითხებში ევროკავშირის უმაღლესი კომისრის, ჯოზეფ ბორელის განცხადებაში.
როგორც ბორელმა აღნიშნა, ბოლო რამდენიმე დღეში უკრაინის სხვადასხვა ოლქში რუსეთის მხრიდან ბოლო კვირების ყველაზე ინტენსიური სარაკეტო დარტყმები განხორციელდა.
„თავდასხმები ლვოვზე და დასავლეთ უკრაინის სხვა ქალაქებზე აჩვენებს, რომ ქვეყნის არც ერთი ნაწილი არ არის დაზღვეული კრემლის უაზრო შეტევისგან. ევროკავშირი აქტიურად უჭერს მხარს სისხლის სამართლის საერთაშორისო სასამართლოს მუშაობას და ზომებს, რომლებიც მიმართულია ადამიანის უფლებებისა და საერთაშორისო ჰუმანიტარული სამართლის დარღვევისთვის პასუხისმგებლობის დაკისრებისკენ. დაუსჯელობა ომის დანაშაულებისთვის შეუძლებელია“, – ნათქვამია ევროკავშირის უმაღლესი წარმომადგენლის განცხადებაში.
ევროკავშირი აფასებს უკრაინელი ხალხის სიმტკიცეს, სიმამაცესა და მდგრადობას რუსეთის აგრესიისთვის წინააღმდეგობის გაწევისას და მტკიცე სოლიდარობას უცხადებს მას, მათ შორის სამხედრო ტექნიკის მიწოდების მხარდაჭერით.
„რუსეთმა დაუყოვნებლივ და უპირობოდ უნდა შეწყვიტოს საბრძოლო მოქმედებები და გაიყვანოს უკრაინიდან ყველა ძალა და სამხედრო ტექნიკა“, – ნათქვამია განცხადებაში.
