უკრაინის მოსაზღვრე რუსეთის სამ რეგიონში აფეთქებების ხმა ისმის, - ინფორმაციას რუსული მედია ადგილობრივ ხელისუფლებაზე დაყრდნობით ავრცელებს.
მათივე ცნობით, აფეთქებას მოჰყვა ხანძარი ბელგოგრადში, სოფელ სტარაია ნელიდოვკაში, უკრაინის საზღვრის ჩრდილოეთით დაახლოებით 10 მილის დაშორებით მდებარე საბრძოლო მასალის საცავში. რეგიონის გუბერნატორის თქმით, ხანძრის შედეგად არავინ დაიღუპა ან დაშავდა.
ამასთანავე, აფეთქებების ხმა ისმონა კურსკის რაიონში, ადგილობრივი დროით 2:45 საათზე. გუბერნატორის თქმით, აფეთქებების დეტალები ზუსტდება, თუმცა შემთხვევას ნგრევა არ მოჰყოლია და არავინ დაღუპულა.
გავრცელებული ინფორმაციით, ვორონეჟში ადგილობრივმა მოსახლეობამ დილის 4:40 საათზე ორი ძლიერი აფეთქების ხმა გაიგო.
„შემთხვევის ადგილზე იმყოფებიან სამოქალაქო თავდაცვისა და საგანგებო სიტუაციებზე რეაგირების ჯგუფი, ასევე რუსეთის საგანგებო სიტუაციების სამინისტროს ჯგუფი. ადგილზე საგამოძიებო კომიტეტის ოფიციალური პირიც ჩავა“, - წერს რუსული სამთავრობო მედია საგანგებო სიტუაციების სამსახურის წარმომადგენელზე დაყრდნობით.
ვორონეჟი უკრაინის საზღვრიდან დაახლოებით 200 მილის დაშორებით მდებარეობს და ის მთავარ სამხედრო და სატრანსპორტო კერას წარმოადგენს.
რუსეთის ოფიციალურმა პირებმა არაერთხელ დაადანაშაულეს უკრაინა საწვავის საცავებსა და სამხედრო ობიექტებზე საზღვრისპირა თავდასხმების განხორციელებაში.
უკრაინის სამთავრობო უწყებებში აცხადებენ, რომ რუსეთის ბრალდებები მიზნად ისახავს „ანტიუკრაინული განწყობების გაღვივებას“.
